Հայտնի է դարձել արքայազն Հարրիի և Մեգան Մարքլի կինոնախագծերի ձախողման մասին

Արքայազն Հարրիի և նրա կնոջ՝ Մեգան Մարքլի կինոնախագծերը, որոնք ստեղծվում էին Netflix հարթակի համար, չեն կարողացել հասնել սպասված հաջողությանը։ Այդ մասին հայտնում է Page Six-ը՝ նշելով, որ զույգի մի քանի նախագծեր արդեն երեք տարի շարունակ մնում են անորոշ վիճակում։

Խոսքը վերաբերում է հատկապես Քարլի Ֆորչունի «Հանդիպիր ինձ լճի մոտ» բեսթսելերի էկրանավորմանը, որտեղ Հարրին և Մարքլը հանդես էին գալիս որպես պրոդյուսերներ։ Գրեթե երեք տարվա ընթացքում նախագծի համար դեռևս չեն ընտրվել ոչ ռեժիսոր, ոչ դերասանական կազմ։ Նույն իրավիճակում է նաև Ժասմին Գիլորիի «Հանդիպում հարսանիքին» գրքի էկրանավորումը։

Միաժամանակ նրանց նոր վավերագրական ֆիլմը՝ «Թխվածքաբլիթների թագուհին», թեև դրական արձագանքներ է ստացել Sundance փառատոնում, դեռևս չի ձեռք բերվել որևէ դիստրիբյուտորի կողմից։ Մեգան Մարքլի խոհարարական «Սիրով՝ Մեգան» շոուն նույնպես փակվել է երկրորդ սեզոնից հետո՝ դիտումների նվազման պատճառով, ինչի ֆոնին կասկածի տակ է դրվել զույգի բազմամիլիոնանոց պայմանագրի ապագան Netflix-ի հետ։