Գերմանացի քաղաքական գործիչը կանխատեսել է Volkswagen-ի հնարավոր ճգնաժամը

Գերմանական ավտոհսկա Volkswagen ընկերությանը կարող է սպասել լուրջ ճգնաժամ՝ Եվրամիության և Գերմանիայի ներկայիս քաղաքականության պատճառով։ Այդ կարծիքը հայտնել է Գերմանիայի «Այլընտրանք Գերմանիայի համար» (AfD) կուսակցության համանախագահ Ալիս Վայդելը, գրում են «Известия»-ն։

Քաղաքական գործիչը նման հայտարարություն է արել ընկերության տարեկան հաշվետվությունից հետո։ Փաստաթղթի համաձայն՝ Volkswagen-ի զուտ շահույթը 2025 թվականին նվազել է գրեթե 44 տոկոսով՝ 12.4 միլիարդ եվրոյից հասնելով 6.9 միլիարդի։ Միաժամանակ ընկերության ընդհանուր շրջանառությունը փոքր-ինչ նվազել է՝ հասնելով մոտ 322 միլիարդ եվրոյի։

Ֆինանսական դժվարությունների ֆոնին ավտոկոնցեռնը նախատեսում է մինչև 2030 թվականը կրճատել շուրջ 50 հազար աշխատատեղ և շարունակել ծախսերի կրճատումը։ Ընկերությունը արդեն կարողացել է խնայել մոտ 1 միլիարդ եվրո, իսկ առաջիկա տարիներին նպատակ ունի տարեկան ծախսերը նվազեցնել մինչև 6 միլիարդ եվրոյով։ Վաճառքների անկման հիմնական պատճառներից մեկը համարվում է նաև Չինաստանի շուկայում պահանջարկի նվազումը։