Քաղաքագետ. Իսրայելն աշխատում է սեփական «ՆԱՏՕ»-ի ստեղծման վրա

Իսրայելը փորձում է ձևավորել սեփական ռազմական դաշինքների համակարգ, որը կարող է հիշեցնել ՆԱՏՕ-ին և ամրապնդել Թել Ավիվի ազդեցությունը Մերձավոր Արևելքում։ Այդ մասին «Լենտա.ռու»-ին տված հարցազրույցում հայտարարել է բրիտանացի քաղաքագետ, Իսրայելի կառավարության նախկին խորհրդական Դանիել Լևին։

Նրա խոսքով՝ նման նախաձեռնությունը կապված է ԱՄՆ-ի ռազմավարական դիրքերի թուլացման և ՆԱՏՕ-ի ներսում առկա ճգնաժամի հետ։ Լևին նշել է, որ Իսրայելն արդեն առաջընթաց է գրանցել հնարավոր դաշինքի ձևավորման ուղղությամբ՝ զարգացնելով հարաբերությունները Հունաստանի, Արաբական Միացյալ Էմիրությունների, Սուդանի ապստամբների, Սոմալիլենդի, Եթովպիայի, ինչպես նաև հնարավոր է՝ Հնդկաստանի հետ։

Քաղաքագետի գնահատմամբ՝ տարածաշրջանի այլ երկրներ ևս փորձում են հավասարակշռել Իսրայելի ազդեցությունը։ Նրա կարծիքով՝ Թուրքիան կարող է ստեղծել սեփական ռազմական համագործակցության ցանցը՝ ներգրավելով Սաուդյան Արաբիան, Քաթարը, Պակիստանը, Սոմալին և Եգիպտոսը, ինչը կարող է հանգեցնել Մերձավոր Արևելքում երկու հակադիր ռազմաքաղաքական բլոկների ձևավորմանը։