Ռուսական բանկերի թոփ-մենեջերների պարգևավճարները հասել են 63 միլիարդ ռուբլու

2025 թվականի արդյունքներով Ռուսաստանի 15 խոշոր բանկերի թոփ-մենեջերներին վճարված ընդհանուր պարգևավճարները գերազանցել են 63 միլիարդ ռուբլին։ Այս մասին, հղում անելով բանկերի միջազգային ֆինանսական հաշվետվություններին (IFRS), հայտնում է Коммерсантъ-ը։ Չնայած ցուցանիշի մեծությանը՝ աճը եղել է համեստ՝ ընդամենը 2.8%, այն դեպքում, երբ 2024-ին պարգևավճարները աճել էին մոտ 20%-ով։

Վերլուծությունը ցույց է տալիս, որ այս դանդաղ աճը պայմանավորված է բանկերի ֆինանսական արդյունքներով․ եթե 2024-ին մաքուր շահույթն աճել էր 6.7%-ով, ապա 2025-ին՝ միայն 1.1%-ով։ Միևնույն ժամանակ, բանկերի մոտ կեսը կրճատել է թոփ-մենեջերների պարգևավճարները․ նման քայլի են դիմել, մասնավորապես, Էքսպոբանկը, «Սանկտ Պետերբուրգ» բանկը, ՊՍԲ-ն և Գազպրոմբանկը։

Փորձագետները նշում են, որ պարգևավճարների մի մասը տրամադրվում է բաժնետոմսերի տեսքով, ինչը ղեկավարներին հնարավորություն է տալիս հավելյալ շահույթ ստանալ դրանց վաճառքից։ Միաժամանակ Ռուսաստանի կենտրոնական բանկը քննարկում է մեխանիզմներ, որոնք կսահմանափակեն պարգևավճարները ֆինանսական վատ ցուցանիշների դեպքում և նույնիսկ կթույլատրեն դրանց հետվերադարձը՝ նպատակ ունենալով խթանել բանկերի ղեկավարությանը բարելավել իրենց կառույցների ֆինանսական արդյունավետությունը։