Որքա՞ն մայոնեզ կարելի է ուտել օրական․ բժիշկը բացահայտել է անվտանգ սահմանը

Մայոնեզի օգտագործման թույլատրելի քանակը կախված է մարդու ընդհանուր սննդակարգից։ Այս մասին նշել է նեյրոգաստրոէնտերոլոգ Անդրեյ Սիմակովը՝ ընդգծելով, որ եթե մենյուն հարուստ է յուղոտ մթերքներով՝ երշիկ, պանիր, ճարպոտ միս կամ խմորեղեն, ապա նույնիսկ փոքր քանակով մայոնեզը կարող է ավելորդ լինել։

Մասնագետի խոսքով՝ կարևոր է հաշվի առնել օրական ճարպերի ընդհանուր քանակը։ Դրանք պետք է կազմեն մոտ 30 տոկոս ընդհանուր կալորիականությունից, իսկ հագեցած ճարպերը՝ ոչ ավելի քան 10 տոկոս։ Միջինում խորհուրդ է տրվում օրական ընդունել մոտ 0.8–1 գրամ ճարպ մեկ կիլոգրամ մարմնի քաշի համար՝ պահպանելով բալանս բուսական և կենդանական ճարպերի միջև։

Բժիշկը նաև զգուշացնում է, որ մարդիկ հաճախ չեն հաշվարկում մայոնեզը որպես առանձին կալորիական աղբյուր՝ այն ավելացնելով տարբեր ուտեստների մեջ։ Արդյունքում նույնիսկ փոքր չափաբաժիններով օգտագործվող սոուսը կարող է զգալիորեն բարձրացնել օրվա ընդհանուր կալորիականությունը և բացասաբար անդրադառնալ առողջության վրա։