«Հայաստանը նախկինում մերն էլ չէր, հիմա արդեն մերն է»․ Փաշինյան

««Ղարաբաղը մերն էր ու այլևս մերը չէ» խոսույթը աշխարհաքաղաքական թակարդում մեր գտնվելու փիլիսոփայությունն ու հայեցակարգն է, իրականությունն այն է, որ Հայաստանը մերը չէր ու այլևս մերն է, իրականություն այն է, որ մեզ հայտնի բոլոր տարածքները հայկական վերահսկողության տակ եղել են մեր պետության, մեր ինքնիշխանության ու անկախության հաշվին, ու մենք դա չենք հասկացել»,- ասաց Նիկոլ Փաշինյանը։

Ազգային ժողովում ունեցած իր ելույթում Նիկոլ Փաշինյանը ներկայացրեց Հայաստանի զարգացման իր տեսլականը՝ հայտարարելով, որ երկիրը հաղթահարել է գոյատևման ու մշտական մաքառման փուլը և մտել է «պարզապես ապրելու» պատմական դարաշրջան։

Փաշինյանի խոսքով՝ այսօր կարող ենք ասել, որ ՔՊ-ն փոխել է մեր պատմության կործանարար ընթացքն ու Հայաստանը դրել խաղաղ ու ստեղծարար պատմության ընթացքի մեջ։ Միևնույն ժամանակ, Փաշինյանը չշրջանցեց անցյալի ծանր գինը՝ նշելով, որ ներկա իրավիճակը ձեռք է բերվել զոհերի, զրկանքների և լուրջ փորձությունների գնով։ Նրա ձևակերպմամբ՝ երկիրը անցել է «դժոխքի միջով», որպեսզի հասնի այս փուլին։