ԱՄՆ-ում կործանիչների սուր պակաս․ հնացող ավիապարկը վտանգի տակ է դնում մարտունակությունը

ԱՄՆ ռազմաօդային ուժերի Ազգային գվարդիան դիմել է Կոնգրեսին՝ պահանջելով ավելացնել ռազմական ինքնաթիռների գնումների ծավալը՝ մատնանշելով կործանիչների սուր պակասը։ Ինչպես հայտնում է Military Watch Magazine-ը, համապատասխան նամակը ստորագրել են ավելի քան 20 նահանգների գեներալ-ադյուտանտներ։ Նամակում նշվում է, որ ԱՄՆ ռազմաօդային ուժերը իրենց 78-ամյա պատմության ընթացքում երբևէ չեն եղել այսքան հին, այսքան փոքրաթիվ և այսքան ցածր մարտունակ։

Գվարդիան առաջարկում է սահմանել բազմամյա ֆինանսավորում՝ տարեկան 72-ից 100 նոր կործանիչ ձեռք բերելու համար, մինչդեռ ներկայումս գնումները կազմում են ընդամենը 48-64 միավոր։ Այդահոյի Ազգային գվարդիայի բրիգադային գեներալ Շենոն Սմիթը զգուշացրել է, որ գործող կործանիչների պարկը արագորեն հնանում է։ Նրա խոսքով՝ մի քանի տարի անց այդ ինքնաթիռները դժվարությամբ կպահպանեն թռիչքային պիտանիությունը, էլ չասած՝ ժամանակակից պահանջներին համապատասխանելը։ Իրավիճակը բարդանում է նաև Չինաստանում վեցերորդ սերնդի կործանիչների նախատիպերի ի հայտ գալով, ինչը նվազեցնում է ամերիկյան հինգերորդ սերնդի ինքնաթիռների նկատմամբ հետաքրքրությունը։

Միաժամանակ, ԱՄՆ-ում մշակվող վեցերորդ սերնդի F-47 կործանիչի ծրագիրը կարող է բախվել լուրջ խնդիրների՝ չափազանց բարձր արժեքի պատճառով։ Նախագիծը պահանջում է նոր, դեռևս չստեղծված ստելս-ծածկույթներ, ինչպես նաև սկզբունքորեն նոր շարժիչ, որը կապահովի մոտ երեք Մախ արագություն։ Բացի այդ, ռազմաօդային ուժերը դեռևս չեն ընտրել այն անօդաչու սարքը, որը պետք է ուղեկցի կործանիչներին։ Ըստ գնահատականների՝ յուրաքանչյուր F-47-ի արժեքը կարող է հասնել շուրջ 300 միլիոն դոլարի, ինչը չափազանց բարձր է նույնիսկ մոտ 1,5 տրիլիոն դոլար կազմող պաշտպանական բյուջեի պայմաններում։