Արտակարգ իրավիճակ՝ Լոռու մարզում. ջրատարի վնասման պատճառով ավազահողային զանգվածի մի հատված սահել ու լցվել է երկաթգծի վրա

Այսօր՝ ապրիլի 16-ին, արտակարգ իրավիճակ է ստեղծվել Լոռու մարզում։ Ժամը 14:00-ի սահմաններում Վանաձոր-Ալավերդի ավտոճանապարհի Փամբակ գյուղի տարածքում գործող գազալցակայանի մոտակայքում ջրատարի վթարի հետևանքով ավազահողային զանգվածը ջրի արտահոսքի և լվացման պատճառով սահել է դեպի երկաթգիծ։

Ինչպես հայտնում է ֆոտոլրագրող Գագիկ Շամշյանը, դրա հետևանքով երկաթգծի մոտ 100 գծամետր հատվածը և մոտ 100 խորանարդ մետր հողազանգված լցվել է երկաթգծի կողային հատվածներում, ինչի պատճառով էլ երկաթգծով գնացքների տեղաշարժը դարձել է անհնար։Օպերատիվորեն ժամանել են «Հարավկովկասյան երկաթուղի» ընկերության ներկայացուցիչներն ու ՀՀ Ներքին գործերի նախարարության Փրկարար ծառայության Լոռու մարզային փրկարարական վարչության Գուգարքի հրշեջ-փրկարարական ջոկատից 1 մարտական հաշվարկ։

Դեպքի մասին տեղեկանալով՝ Լոռու մարզպետ Արմեն Մկրտչյանի հանձնարարականով ժամանել են նաև մարզպետարանի համապատասխան վարչության ծառայողները։Օպերատիվորեն ժամանել են նաև «Վեոլիա ջուր» ընկերության ներկայացուցիչները։Այս պահին ջրի արտահոսքը ժամանակավորապես դադարեցվել է և իրականացվում են վթարավերականգնողական աշխատանքներ։Ըստ նախնական տեղեկությունների՝ բարեբախտաբար տուժածներ չկան։