«Մանչեսթեր Սիթին» հաստատել է Բեռնարդու Սիլվայի հեռանալու լուրը

«Մանչեսթեր Սիթին» իր պաշտոնական կայքում հայտարարել է, որ թիմի կիսապաշտպան Բեռնարդու Սիլվան ընթացիկ մրցաշրջանի ավարտից հետո կհեռանա ակումբից՝ պայմանագրի ժամկետի լրանալու կապակցությամբ։

31-ամյա պորտուգալացի ֆուտբոլիստի գործող համաձայնագիրն անգլիական գրանդի հետ սպառվում է այս տարվա հունիսի 30-ին։

Ֆուտբոլիստը սոցիալական ցանցերի իր էջերում հուզիչ գրառում է կատարել՝ հրաժեշտ տալով երկրպագուներին ու ակումբին.

«Այս քաղաքն ու այս ակումբն ինձ տվեցին շատ ավելին, քան ես երբևէ կարող էի հուսալ: Այն ամենը, ինչին մենք հասանք և հաղթեցինք միասին, մի ժառանգություն է, որը հավերժ կմնա իմ սրտում:

Շնորհակալ եմ ակումբին, Պեպ Գվարդիոլային և իմ բոլոր թիմակիցներին այս ինը տարիների և անմոռանալի հիշողությունների համար: Այն մթնոլորտը, որը մենք ամեն օր ստեղծում էինք մարզաբազայում, ինձ ստիպում էր այստեղ զգալ ինչպես տանը: Եկեք միասին վայելենք այս վերջին շաբաթները և պայքարենք այն ամենի համար, ինչ այս մրցաշրջանը դեռ կարող է տալ մեզ»:

Հիշեցնենք, որ Սիլվան «Մանչեսթեր Սիթի» էր տեղափոխվել 2017 թվականին՝ ֆրանսիական «Մոնակոյից»: «Քաղաքայինների» կազմում անցկացրած տարիների ընթացքում նա դարձել է Անգլիայի վեցակի չեմպիոն, հինգ անգամ նվաճել է Անգլիական լիգայի գավաթը և երկու անգամ՝ Անգլիայի գավաթը: Պորտուգալացին իր հարուստ տիտղոսների շարքը համալրել է նաև Չեմպիոնների լիգայի, ՈւԵՖԱ-ի Սուպերգավաթի և Աշխարհի ակումբային առաջնության գավաթներով: