Թրամփը «կորցրել է ձայնը» Իրանի հետ թեժ բանակցությունների ընթացքում

ԱՄՆ նախագահ Դոնալդ Թրամփը Իրանի ներկայացուցիչների հետ հեռախոսային բանակցությունների ընթացքում այնքան լարված քննարկում է վարել, որ արդյունքում կորցրել է ձայնը։ Այս մասին հայտարարել է ամերիկացի սենատոր Լինդսի Գրեհեմը՝ նրա խոսքերը մեջբերում է Clash Report-ը։

Գրեհեմի խոսքով՝ Թրամփը անձամբ է վարում բանակցությունները Իրանի հետ և մի քանի օր առաջ ունեցած հեռախոսազրույցը եղել է չափազանց թեժ։ «Նա բարձր տոնով հայտարարել է, թե ինչ կլինի, եթե Իրանը շարունակի իր գործողությունները։ Զրույցն այնքան սրվել է, որ նա բառացիորեն կորցրել է ձայնը», — նշել է սենատորը՝ հավելելով, որ չէր ցանկանա լինել այն մարդկանց տեղում, ովքեր գտնվում էին մյուս կողմում։

Միաժամանակ Politico-ն գրում է, որ ԱՄՆ-ն և Իրանը շարունակում են տարաձայնություններ ունենալ ուրանի հարստացման հարցում։ Վաշինգտոնը առաջարկում է 20 տարվա արգելք, մինչդեռ Թեհրանը համաձայն է միայն հինգ տարվա դադարեցմանը։ Ավելի վաղ Ռուսաստանի նախագահ Վլադիմիր Պուտինը առաջարկել էր Իրանից հարստացված ուրանը տեղափոխել Ռուսաստան, սակայն այդ առաջարկը մերժվել է, թեև Մոսկվան շարունակում է պատրաստակամություն հայտնել աջակցել լարվածության նվազեցմանը։