Չգիտես ինչու՝ նախաքննության փուլում բոլորը տվել են այլ ցուցմունք. Ազատի կացարանի հրդեհի գործով մեղադրյալ

Գեղարքունիքի մարզի ընդհանուր իրավասության դատարանում Ազատ գյուղի զինվորական կացարանում զոհված 15 զինծառայողների գործով դատական հերթական նիստին հարցաքննվեց մեղադրյալ Մառլեն Սարգսյանը։

«Ես դեպքի հետ առնչություն չեմ ունեցել, ես մինչև գնացել-հասել եմ դեպքի վայր, անգամ չեմ կարողացել մոտենալ շենքին»,-ասաց Մ. Սարգսյանը՝ նշելով, որ կպատասխանի հարցերին։ 

Նա նշեց, որ Ազատ գյուղում տեղակայված ինժեներասակրավորային  վաշի կացարան այցելել է մեկ անգամ. «Ոչ թե այցելել եմ ինչ որ կարգադրություն  կատարելու, այլ ուղղակի այդ ճանապարհով անցել եմ, տեսել եմ զինվորականներ, կանգնել եմ, իմացել եմ, որ վաշտ է կգտնվում։ Ծանրաբեռնվածություն այնքան շատ է եղել, որ անգամ ժամանակ է եղել 2-ը մնացել է, մադկանց համար լույս ենք ապահովել, քանի որ ընդհանուր զորամասը ցրված է  Վարդենիսի տարածքով մեկ։ Ոչ մի տեղ լիարժեք չէր համապատասխանում զինվորի բնակվելու համար»։ 

Հանրային մեղադրողի հարցին՝ չի՞ նկատել, որ այդ կացարանում ջեռուցվում է վառարանի միջոցով, Մ. Սարգսյանն ասաց. «Ես ներս չեմ մտել»։ Չի հիշում՝ դրսում վառելափայտ նկատել է, թե ոչ։ 

Հարցին՝  չի՞ նկատել, որ անձնակազմը երբևէ հակահրդեհային միջոցներ չի ստացել, նա ասաց. «Չեմ նկատել, քանի որ չեն էլ դիմել այդ հարցով, մտածել եմ՝ դրա կարիքը չունեն»։ 

Դատական նիստի ընթացքում դատարանում իրավիճակը պարբերաբար լարվում է։ Տուժածների իրավահաջորդները տեղից արձագանքում են Սարգսյանի հայտարարություններին, դատավորը կոչ է անում լռություն պահպանել։ 

Մեղադրողը հարցրեց՝ ինչո՞վ է պայմանավորված, որ ի վնաս իրեն ցուցմունք են տվել, ի՞նչ շարժառիթ են ունեցել, նա պատասխանել է. «Չգիտես ինչու նախաքննության փուլում բոլորը տվել են այլ ցուցմունք, բայց երբ որ եղել է  առերեսում, հրաժարվում են նախնական տված ցուցմունքից»։ 

Հիշեցնենք, որ 2023-ին հունվարի 19-ին, ժամը  01.30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետևանքով զոհվել էր 15 ժամկետային զինծառայող, 7 զինծառայող տեղափոխվել էր հոսպիտալ։