Նյարդաբանը ներկայացրել է ուղեղի ծերացման դանդաղեցման և կանխման արդյունավետ մեթոդները

Մաջիդ Ֆոտուհին՝ Ջոնս Հոփքինսի համալսարանին կից ինստիտուտի նյարդաբանը, հայտարարել է, որ ուղեղի ծերացման գործընթացը հնարավոր է զգալիորեն դանդաղեցնել։ Daily Mail-ին տված հարցազրույցում նա նշել է, որ հակառակ տարածված կարծիքին՝ ուղեղը կարող է վերականգնվել, ստեղծել նոր նեյրոնային կապեր և հարմարվել ծանրաբեռնվածությանը։

Մասնագետի խոսքով՝ դեմենցիայի դեպքերի ավելի քան կեսը հնարավոր է կանխել։ Նա ընդգծել է, որ առողջ ապրելակերպը առանցքային դեր ունի՝ ներառելով ֆիզիկական ակտիվություն, մտավոր վարժություններ, լիարժեք քուն, հավասարակշռված սնունդ և սթրեսի նվազեցում։ «Եթե մարզում եք ուղեղը և պահպանում մարմինը, այն կարող է դառնալ ավելի ուժեղ և արդյունավետ աշխատել», — նշել է նա։

Ֆոտուհին հավելել է, որ նույնիսկ մի քանի ամսվա ընթացքում հնարավոր է տեսանելի արդյունքներ գրանցել։ Նրա խոսքով՝ հիշողության մարզումը և կանոնավոր վարժությունները բարելավում են ուշադրությունն ու մտածողությունը, դանդաղեցնում տարիքային փոփոխությունները և բարձրացնում ուղեղի դիմադրողականությունը հիվանդությունների նկատմամբ։ Ավելի վաղ նյարդաբան Պավել Խորոշևը նշել էր, որ պլանավորումը ուղեղի լավագույն մարզումներից մեկն է, քանի որ այն ակտիվացնում է մտածողության մի քանի կարևոր գործընթացներ։