Կինը տան ձեղնահարկում հայտնաբերել է լուսանի որջը՝ ձագերով

ԱՄՆ Արիզոնա նահանգում բնակվող մի կին սեփական տան ձեղնահարկից լսվող տարօրինակ ձայներից հետո պարզել է, որ այնտեղ որջ է կառուցել վայրի լուսանը՝ իր ձագերի հետ։ Դեպքի մասին հայտնել է People ամսագիրը։

Տան սեփականատերը մի քանի օր շարունակ լսել է քերծոցի, մռնչոցի և ծանր քայլերի ձայներ, ինչից հետո դիմել է վայրի կենդանիների անվտանգ տեղափոխմամբ զբաղվող Critter Evictors կազմակերպությանը։ Մասնագետները ձեղնահարկում հայտնաբերել են լուսանի մայրիկին և նրա ձագերին՝ նշելով, որ սա իրենց աշխատանքի ընթացքում ամենաանսովոր դեպքերից մեկն էր։

Կազմակերպության աշխատակիցները կենդանիներին չեն վնասել։ Նրանք մի քանի օր շարունակ պարբերաբար այցելել են ձեղնահարկ, որպեսզի լուսանը սկսի այդ վայրը վտանգավոր համարել։ Արդյունքում գիշատիչը ինքնուրույն տեղափոխել է ձագերին այլ վայր, իսկ մասնագետներն այնուհետև փակել են բոլոր անցքերը, որոնց միջոցով կենդանին ներթափանցել էր տուն։