Արջը 30 մետր բարձրությունից ցած է գցել և սպանել կաթոլիկ սարկավագին

ԱՄՆ-ի Մոնտանա նահանգի Գլեյշեր ազգային պարկում ավարտվել է 28 տարվա ընթացքում առաջին մահացու հարձակման հետաքննությունը։ Daily Mirror-ի փոխանցմամբ՝ պարզվել է, որ մայիսի 6-ին գրիզլին հարձակվել է Ֆլորիդայից 33-ամյա կաթոլիկ սարկավագ Էնթոնի Պոլիոյի վրա, որը միայնակ արշավում էր Մաունթ Բրաունի արահետով։

Հետաքննության զեկույցի համաձայն՝ հարձակումը տեղի է ունեցել մթնշաղին՝ ծառերով խիտ հատվածում, որտեղ և՛ մարդը, և՛ արջը վերջին պահին են նկատել միմյանց։ Ենթադրվում է, որ վախեցած գրիզլին պաշտպանական արձագանքով հարձակվել է տղամարդու վրա։ Չնայած Պոլիոն հասցրել է օգտագործել արջերին վանելու հատուկ սփրեյ, կենդանին նրան 30 մետր բարձրությունից ցած է գցել լանջով և շարունակել հարձակումը։

Փորձագետների եզրակացությամբ՝ դեպքը եղել է պաշտպանական բնույթի, այլ ոչ թե գիշատչական հարձակում։ ԴՆԹ-ի անալիզը ցույց է տվել, որ հարձակվողը մոտ 15 տարեկան արու գրիզլի է եղել։ Իշխանությունները հայտարարել են, որ արջին չեն որոնի և չեն ոչնչացնի, քանի որ միջադեպը չի գնահատվել որպես մարդու կանխամտածված որս։