Արթուր Ղամբարյանը՝ Գագիկ Ղազինյանի մասին․ Քաղաքական շարժառիթներով նրան ԵՊՀ-ից հեռացնելը ցածր քայլ է

Իրավաբանական գիտությունների դոկտոր, պրոֆեսոր Արթուր Ղամբարյանը մեկնաբանել է Գագիկ Ղազինյանի՝ Երևանի պետական համալսարանից հեռացման մասին տեղեկությունները՝ ընդգծելով, որ այդ որոշումը քաղաքական շարժառիթներով պայմանավորված լինելու դեպքում անընդունելի է։

Ղամբարյանը հիշեցրել է, որ 1997 թվականին, երբ ընդունվել է ԵՊՀ իրավաբանական ֆակուլտետ, ֆակուլտետի դեկան էր նշանակվել Գագիկ Ղազինյանը, որին, նրա խոսքով, հաջողվել էր կարգապահություն հաստատել նույնիսկ ազդեցիկ անձանց զավակների շրջանում։ Նա նշել է, որ Ղազինյանի սկզբունքներից էին դասախոսի նկատմամբ հարգանքը և իրավաբանի մասնագիտական արժանապատվության պահպանումը։

Պրոֆեսորը հավելել է, որ անկախ Ղազինյանի հետ ունեցած տարաձայնություններից և նախկինում ֆակուլտետում առկա խնդիրներից, իրավաբանություն սովորող նոր սերնդին նրա հետ շփվելու և նրանից սովորելու հնարավորությունից զրկելը «չափազանց էժան ու ցածր քայլ է», եթե դրա հիմքում քաղաքական շարժառիթներ են։