Երևանում «Chevrolet»-ի խարդախ վաճառք․ գործընկերը 1.47 մլն դրամի կեղծ անդորրագիր է ուղարկել ու մեքենան վաճառել ուրիշին

Օգոստոսի 28-ին արտառոց դեպք է արձանագրվել Երևանում։ 61-ամյա տղամարդը ոստիկանություն է դիմել և հայտնել, որ հուլիսի սկզբին իր «Chevrolet» մակնիշի ավտոմեքենան մաս-մաս վճարելու պայմանով տրամադրել է իր 42-ամյա գործընկերոջը․ փոխանցում է shamshyan.com-ը։

Դիմողի խոսքով՝ հուլիսի 10-ին գործընկերը որպես կանխավճար իրեն ուղարկել է 1 մլն 470 հազար դրամի՝ իբրև «Հայէկոնոմբանկ»-ի փոխանցման կեղծ անդորրագիր։ Դրանից հետո տղամարդը չի կարողացել կապ հաստատել նրա հետ։

Ավելի ուշ՝ հուլիսի 15-ին, ավտոմեքենայի սեփականատիրոջ հետ կապ է հաստատել իրեն անծանոթ տղամարդ և հայտնել, որ մեքենան 800 հազար դրամով գնել է։ Նա առաջարկել է ներկայանալ ավտոմեքենայի անվանափոխության համար, սակայն հրաժարվել է մեքենան վերադարձնել սեփականատիրոջը։

Դեպքի առթիվ ոստիկանությունում կազմված փաստաթղթերն ուղարկվել են Քննչական կոմիտեի Երևան քաղաքի քննչական վարչության Ավանի և Նոր-Նորք վարչական շրջանների քննչական բաժին՝ հետագա ընթացքը լուծելու համար։