Ռուսաստանը պատասխանել է քաղաքացիական ավիացիայի վերաբերյալ Զելենսկու հայտարարությանը

Ռուսաստանը թույլ չի տա քաղաքացիական ավիացիայի աշխատանքում երկարատև կամ էական ընդհատումներ։ Այս մասին հայտարարել է ՌԴ տրանսպորտի նախարար Անդրեյ Նիկիտինը՝ արձագանքելով Ուկրաինայի նախագահ Վլադիմիր Զելենսկու՝ Ռուսաստանի օդային տարածքի վերաբերյալ հայտարարությանը, փոխանցում է ՌԻԱ Նովոստին։

Արևելյան տնտեսական համաժողովի շրջանակում Նիկիտինը հայտնել է, որ Տրանսպորտի նախարարությունը սերտ համագործակցում է ՌԴ պաշտպանության նախարարության և Ռոսգվարդիայի հետ։ Նրա խոսքով՝ անվտանգության նկատառումներով օդանավակայաններում կարող են ժամանակավոր սահմանափակումներ մտցվել, քանի որ թռիչքների անվտանգությունը առաջնահերթություն է։

Նախարարը նշել է, որ առաջիկա տարիներին Ռուսաստանը կկարողանա հաղթահարել նման իրավիճակների հետևանքները և ապահովել քաղաքացիական ավիացիայի բնականոն աշխատանքը։

Ավելի վաղ Զելենսկու հայտարարությանն արձագանքել էր նաև ՌԴ ԱԳՆ պաշտոնական ներկայացուցիչ Մարիա Զախարովան՝ Կիևին մեղադրելով ահաբեկչական մեթոդներ կիրառելու մեջ։