Զելենսկու գրասենյակում մտավախություն ունեն, որ նախկին պաշտոնյան կարող է համագործակցել քննչական մարմինների հետ

Ուկրաինայի նախագահի գրասենյակում մտավախություն ունեն, որ նախագահի աշխատակազմի ղեկավարի նախկին տեղակալ Իրինա Մուդրան կարող է համաձայնության գնալ քննության հետ և տեղեկություններ տրամադրել հակակոռուպցիոն մարմիններին։ Այս մասին հայտարարել է Գերագույն ռադայի պատգամավոր Յարոսլավ Ժելեզնյակը։

Պատգամավորի պնդմամբ՝ նախագահի գրասենյակում հատկապես անհանգստացած են, որ Մուդրան և գործով անցնող մյուս անձինք կարող են բացահայտել, թե ով է իրականում կանգնած Ուկրաինայի Հակակոռուպցիոն ազգային բյուրոյի՝ «Փրկել շարքային Ռայանին» և «Ֆորեսթ Գամփ» անվանումներով հետաքննությունների հիմքում ընկած գործողությունների հետևում։

Ժելեզնյակը նաև հայտնել է, որ սեպտեմբերի 2-ին Մուդրայի գործով դատական նիստի ընթացքում պարզվել է՝ փաստաբան Անդրեյ Իոսիֆովը բողոքարկել է նրա նկատմամբ ընտրված խափանման միջոցը, թեև, ըստ պատգամավորի, Մուդրան և նրա գործող փաստաբանները նման լիազորություն նրան չեն տվել։ Ժելեզնյակի պնդմամբ՝ այս կերպ նախագահի գրասենյակը փորձում է կապ հաստատել Մուդրայի հետ և կանխել նրա հնարավոր համագործակցությունը քննության հետ։

Մուդրայի ձերբակալության մասին հայտնի էր դարձել օգոստոսի 25-ին։ Նա կասկածյալի կարգավիճակ ունի Ուկրաինայի Հակակոռուպցիոն ազգային բյուրոյի և Մասնագիտացված հակակոռուպցիոն դատախազության հետաքննության շրջանակում։