Փաշինյան․ Նարեկ Նալբանդյանը մեզ նյարդայնացնում է տանելիության բոլոր սահմաններից դուրս

Վարչապետ Նիկոլ Փաշինյանը հերքել է «Արարատցեմենտ» ընկերության՝ գործարար Նարեկ Նալբանդյանին անցնելու մասին տեղեկությունները։

Ճեպազրույցի ընթացքում պատասխանելով լրագրողի դիտարկմանը, թե «Արարատցեմենտն» անցել է իր «սրտի օլիգարխ» Նարեկ Նալբանդյանին, Փաշինյանն ասել է, որ ընկերությունը շարունակում է մնալ ՀՀ կառավարման ներքո, և դրա հետ կապված որևէ գործընթաց տեղի չի ունեցել։

«Ես սրտի օլիգարխ չունեմ, և եթե Հայաստանի տնտեսական դաշտում կա մեկը, որն ինձ կամ իմ ընտանիքին նյարդայնացնում է արդեն տանելիության բոլոր սահմաններից դուրս, դա Նարեկ Նալբանդյանն է»,- հայտարարել է վարչապետը։

Նա տեղեկացրել է, որ իրավապահ մարմիններին հանձնարարել է համապատասխան վարույթներ նախաձեռնել։

«Եթե մենք ստանանք որևէ ապացույց, որ որևէ գործարար, այդ թվում՝ Նարեկ Նալբանդյանը, փորձում է տպավորություն ստեղծել, թե ինքը մեր ընտանիքի հետ որևէ կապ ունի, հավաստիացնում եմ՝ մեր արձագանքը կլինի դաժան, ավելի դաժան, քան սովորական ձևերով»,- նշել է Փաշինյանը։

Վարչապետի խոսքով՝ զարմանալի է, որ նման հրապարակումները Նարեկ Նալբանդյանի կողմից չեն հերքվում։

«Սա մեզ նյարդայնացնում է ահավոր ձևով։ Եթե նույնիսկ այդ հիմնավորումներն արդեն բավարար լինեն, որ փորձ է արվում նման տպավորություն ստեղծել, հավաստիացնում եմ՝ Նարեկ Նալբանդյանը կարժանանա ավելի դաժան ճակատագրի, քան արժանացել են մյուս օլիգարխները»,- ասել է նա։

Փաշինյանը նաև ընդգծել է, որ իր ընտանիքը որևէ բիզնես գործունեության մեջ ներգրավված չէ։