ԱՄՆ զինվորականները մեկ օրում 40 նավ են ուղեկցել Հորմուզի նեղուցով

ԱՄՆ զինված ուժերը մեկ օրվա ընթացքում ապահովել են 40 առևտրային նավերի անցումը Հորմուզի նեղուցով, ինչը, CNN-ի տվյալներով, Իրանի հետ հակամարտության մեկնարկից ի վեր ամենաբարձր ցուցանիշն է։

Հեռուստաալիքի աղբյուրների համաձայն՝ երեքշաբթի ամերիկյան զինվորականների ուղեկցությամբ նեղուցով անցած նավերը տեղափոխել են ընդհանուր առմամբ մոտ 18 միլիոն բարել նավթ։ Գործողությունն իրականացվել է Իրանի և ԱՄՆ-ի միջև հարվածների նոր փոխանակման ֆոնին։

CNN-ի աղբյուրները պնդում են, որ գործողության ընթացքում ամերիկյան ուժերը խոցել են հականավային թևավոր հրթիռներ և հակազդել անօդաչու թռչող սարքերին։

Չնայած գործողության հաջող ավարտին՝ ամերիկացի պաշտոնյաները հակամարտության արագ կարգավորում չեն ակնկալում։ Էներգետիկ ընկերությունները ևս շարունակում են մտահոգված մնալ Հորմուզի նեղուցով նավերի անցման բարձր ռիսկերով՝ նույնիսկ ռազմական ուղեկցության պայմաններում։