Ամբողջ գիշեր շարունակվել են որոնողա-փրկարարական աշխատանքները Տավուշի մարզում տեղի ունեցած սողանքային գոտում: Այս մասին հայտնում է ԱԻՆ մամլո ծառայությունը։
Հոկտեմբերի 4-ի, առավոտյան ժամը 08.20-ի դրությամբ անհայտ կորածների ցուցակում փոփոխություններ չկան: Այս պահին դրությամբ անհայտ կորած են հինգ հոգի։

Չնայած պատահարի հենց առաջին ժամերից դեպքի վայրում են գտնվել նաև ՀՀ պաշտպանության նախարարության և մասնավոր ընկերությունների տրամադրած քարշակներն ու այլ ծանր տեխնիկան` մինչ հիմա, ելնելով եղանակային պայմաններից և սողանքային գոտու շարունակվող ակտիվությունից, փրկարարներն ու կամավորներն աշխատել են բացառապես ձեոքի ուժով` բահերի և այլ փրկարարական գործիքների օգնությամբ:

Ներկայումս մշակվում են տարբերակներ` որոնողական աշխատանքներում ինժեներական ծանր տեխնիկա կամ օդուժ ներգրավելու համար: Բանակցություններ են վարվում հողազանգվածի տակ հայտնված մեքենաները «Հարավկովկասյան երկաթուղու» կռունկների և ՀՀ Պաշտպանության նախարարության ուղղաթիռների օգնությամբ դուրս բերելու վերաբերյալ:

Ներկա դրությամբ սողանքային գոտին բաժանված է 5 տեղամասի, որտեղ աշխատում են տարբեր մարզերից ներգրավված փրկարարներ`մի քանի հերթափոխով:

Հիշեցնենք, որ հոկտեմբերի 2-ին, ժամը 19:03-ին M6 միջպետական մայրուղու 83-րդ կիլոմետրում` Վանաձոր-Բագրատաշեն հատվածում` Այրում երկաթուղային կայարանի կամրջի մոտ (Լճկաձոր գյուղի հատվածում) տեղի է ունեցել սողանք: 130 մ երկարությամբ և 60 մ բարձրությամբ հողազանգվածը լցվել է ավտոճանապարհին և այն ամբողջովին դարձրել անանցանելի: