Հայ ժողովուրդն ԱՄՆ Կոնգրեսում բազմաթիվ բարեկամներ ունի. կոնգրեսական

Հայկական արմատներ ունեցող ամերիկացի կոնգրեսական Աննա Էշուն, որը մայրական կողմից նաև Բաբայան է, հայ-ամերիկյան կապերի ամրապնդման ամենաեռանդուն կողմնակիցներից մեկն է: Նա լիահույս է, որ ապագայում անպայման նպաստելու է Հայաստանի հետ հարաբերությունների առավել խորացմանը և հիշեցրեց, որ հայ ժողովուրդն ԱՄՆ Կոնգրեսում ունի բազմաթիվ բարեկամներ:

Կոնգրեսականի խոսքով՝ հաշվի առնելով հայ-ասորական արմատները՝ ինքը կարող է հատուկ դեր խաղալ այդ հարաբերությունների ամրապնդման գործում: «Ես զգում եմ, որ հատուկ պատասխանատվություն ունեմ, այսպես ասած, սուրբ պարտավորվածություն՝ օգնելու հայ ժողովրդի հետ հարաբերությունների զարգացմանը»: Ինչպես փոխանցում է «Արմենպրես»-ը՝ ներկայացնելով «Ամերիկայի ձայն»-ի անդրադարձը հայկական արմատներով կոնգրեսականին, Աննա Էշուն համոզված է, որ Միացյալ Նահանգները պետք է աջակցի Հայաստանում պետական և հանրային հաստատությունների զարգացմանը, քանի որ հենց այդ հաստատություններն են, որ այնուհետև ժողովրդավարության զարգացման լավագույն գործիքն են դառնում, ինչն էլ իր հերթին բարելավում է տնտեսական վիճակը երկրում:

Կիսվելով ապրիլին՝ Ցեղասպանության հիշատակի օրերին Հայաստան կատարած իր այցի տպավորություններով, կոնգրեսականը նշեց, որ հաճույքով նկատել է տաղանդավոր երիտասարդների բազմությունը Հայաստանում. «Երիտասարդներն ուզում են նայել դեպի ապագան։ Այսպիսով, Հայաստանը պետք է ի վիճակի լինի պահպանելու այդ երիտասարդներին՝ պայմաններ ստեղծելով նրանց համար, որպեսզի տեղի չունենա ուղեղների արտահոսք, և որ նրանք Հայաստանում մնալու պատճառ ունենան, վերականգնեն ու զարգացնեն երկրի տնտեսությունը»:

ԱՄՆ-ի տեխնոլոգիապես ամենազարգացած Սիլիկոնյան հովիտը ներկայացնող կոնգրեսական Էշուի խոսքով՝ այս հարցում Հայաստանին լուրջ աջակցություն պետք է ցուցաբերի Միացյալ Նահանգները' օգնելով կրթել և նոր հնարավորություններ ստեղծելով հայ երիտասարդների համար: «Նրանք նայում են դեպի Արևմուտք և ցանկանում են Արևմտյան ժողովրդավարություն կառուցել, ժողովրդավարություն, որը թույլ կտա երկիրը ոտքի կանգնեցնել»,- ավելացրեց կոնգրեսականը: