Գալուստ Սահակյան. «Ազգային գաղափարախոսությունը օրենքով հնարավոր չէ հասարակության մեջ ներարկել»

Օգոստոսի 20-ին «Բազե» համահայկական երիտասարդական հավաքում հյուրընկալվեց ՀՀ ԱԺ նախագահ Գալուստ Սահակյանը։ Խորհրդարանի նախագահը դիտեց բազեականների սպորտային մրցույթները։ Ողջունելով հավաքի մասնակիցներին՝ նա նշեց. «Բազեներն առաջին տարիներին լուրջ հարվածներ էին ստանում տարբեր տեղերից, շատերը մտածում էին, որ քաղաքականացվում է մի երիտասարդական շրջան: Բայց բոլորովին այդպես չի եղել: Մեր նպատակն է ոչ թե քաղաքականացնել երիտասարդներին, այլ մղել իրենց խնդիրները լուծելու»: Պարոն Սահակյանը նաև նկատեց. «Այսօր արդեն կարող ենք ասել, որ հայաստանյան ամառը երիտասարդական է նման երիտասարդական ծրագրերի շնորհիվ»:

Գալուստ Սահակյանը պատասխանեց նաև երիտասարդների հարցերին, որոնք վերաբերում էին սահմանադրական բարեփոխումներին, ազգային գաղափարախոսությանը, խորհրդարանի աշխատանքին ու այդ կառույցի՝ հասարակական ընկալմանը: Երիտասարդների կողմից առաջարկ հնչեց, թե հնարավոր չէ՞ օրենքով ամրագրել, որ 100 հոգուց ավելի երիտասարդական հավաքների ընթացքում պարտադիր լինի դասընթաց կազմակերպել ազգային արժեքների վերաբերյալ: Պարոն Սահակյանը պատասխանեց. «Լավ առաջարկություն եք անում, բայց ազգային գաղափարը օրենքով հնարավոր չէ հասարակության մեջ ներարկել, դա մշակույթ է, պիտի ազգի ներկայացուցիչները հակված լինեն դրան, մշակույթ պիտի ձևավորվի, ազգային գաղափարախոսությունը դասախոսությամբ հնարավոր չէ առաջ տանել»:

Հիշեցնենք, որ «Բազե» հավաքը մեկնարկել է օգոստոսի 17-ին։ Այն կազմակերպել է Հայաստանի երիտասարդական հիմնադրամը։ Հավաքին ամեն տարի մասնակցում է շուրջ 500 երիտասարդ Հայաստանից, Արցախից և սփյուռքից։