Ֆրանսիական կազմակերպության միջոցներով Վահանում եւ Դպրաբակում կվերանորոգեն համայնքների բուժկետերը

Գեղարքունիքի մարզի եւ Ֆրանսիայի Հանրապետության Իզերի դեպարտամենտի Գլխավոր խորհրդի միջեւ ստորագրված ապակենտրոնացված համագործակցության շրջանակներում ֆրանսիական «Բժշկական օգնություն եւ զարգացում» կազմակերպության միջոցներով կնորոգվեն Վահան եւ Դպրաբակ համայնքների բուժկետերը:

Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմի տեղեկ ատվության եւ հասարակայնության հետ կապերի բաժնից, այս մասին օգոստոսի 25-ին Գեղարքունիքի մարզպետի տեղակալ Անդրանիկ Հակոբյանի մոտ տեղի ունեցած ընդունելության ժամանակ հայտարարել են ֆրանսիական «Բժշկական օգնություն եւ զարգացում» կազմակերպության ծրագրերի համակարգող Օֆելի Կատոինը եւ նույն կազմակերպության խորհրդի անդամ Ժան-Պոլ Մասնադան:

Հանդիպման ընթացքում քննարկվել են մարզում առաջնահերթ համարվող բուժկետերի վերանորոգման ծրագրի, ինչպես նաեւ շինարարական կազմակերպությունների ընտրությանը վերաբերող հարցերը: Ինչպես նշել են ֆրանսիական կազմակերպության ներկայացուցիչները' 2015 թվականի ընթացքում «Բժշկական օգնություն եւ զարգացում»-ը Վարդենիսի տարածաշրջանում իրականացրել է առողջապահական ոլորտի աշխատակիցների վերապատրաստում, Ճամբարակի տարածաշրջանի համայնքներում' բուժկետերի վերանորոգում, բժշկական սարքավորումների վերազինում եւ տրամադրել շտապօգնության պայուսակներ: Գրենոբլ եւ Սեւան քաղաքների համագործակցության շրջանակներում նախատեսվում է վերանորոգել նաեւ Սեւան քաղաքի «Բողբոջ» մսուր-մանկապարտեզի բուժկետը:

Իսկ Իզերի դեպարտամենտի գլխավոր խորհրդի աջակցությամբ իրականավցելիք վերանորոգման ծրագրում առաջարկվել է ընդգրկել Ճամբարակի տարածքի Վահան եւ Դպրաբակ համայնքների բուժկետերը: Փոխադարձ համաձայնության արդյունքում' կարճ ժամանակահատվածում նշված կառույցներում կմեկնարկեն նախագծով նախատեսված աշխատանքները:

Խոսրով Խլղաթյան