Ադրբեջանի Միլի Մեջլիսը Եվրախորհրդարանի բանաձեւը «խիստ վիրավորական» է բնութագրել

Ադրբեջանի Միլի Մեջլիսը սեպտեմբերի 14-ի նիստում որոշում է ընդունել, որում սեպտեմբերի 10-ին Եվրախորհրդարանի ընդունած բանաձեւը «խիստ վիրավորական» է բնութագրել: Եվրախորհրդարանի բանաձեւում Ադրբեջանում մարդու իրավունքների ոտնահարումների պատճառով այդ երկրի դեմ պատժամիջոցների կոչ է արվում:

Ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, որոշման մեջ նշվում է, թե Եվրախորհրդարանի բանաձեւը վկայում է, որ Արեւմուտքում Ադրբեջանին «վարկաբեկելու արշավ» է սկսվել: Նշվում է նաեւ, որ այն բանից հետո, երբ Եվրախորհրդարանը անցյալ տարվա սեպտեմբերին սկսել է գործել նոր կազմով, նրա ղեկավարության պատճառով Ադրբեջանի հետ համագործակցությունը չի կայացել, քանի որ Եվրախորհրդարանի նախագահը «ոչ պաշտոնապես արգելք է դրել իր պատգամավորների այցերին Ադրբեջան»:

Նշվում է նաեւ, որ Ադրբեջանի դեմ բանաձեւում առաջ քաշված պահանջները «որեւէ իրավական հիմք չունեն»:

Ադրբեջանի խորհրդարանը ԵԽԽՎ «Եվրոնեսթ»-ում իր մասնակցության դադարեցման գործառույթ սկսելու մասին որոշում է ընդունել: Միլի Մեջլիսը Եվրախորհրդարանից պահանջել է հրաժարվել Ադրբեջանի դատական համակարգի վրա «ճնշում գործադրելու փորձերից», ինչպես նաեւ նոյեմբերի 1-ին Ադրբեջանում անցկացվելիք խորհրդարանական ընտրություններին դիտորդներ չուղարկելու կոչերից:

Բացի այդ, ադրբեջանական խորհրդարանը «զգուշացրել» է, որ եթե Ադրբեջանի դեմ վիզային արգելքներ սահմանվեն, ապա Բաքուն եւս կքննարկի Եվրախորհրդարանի եւ Եվրամիության պաշտոնական անձանց այցերը «սահմանափակելու մասին հարցեր»: Փաստաթղթում ընդգծվում է նաեւ ԵՄ «Արեւելյան գործընկերության» ծրագրի շրջանակում Ադրբեջանի գործունեության ձեւաչափի փոփոխության անհրաժեշտությունը:

Մինչ նման որոշման ընդունումը, ադրբեջանական խորհրդարանում ելույթ ունեցող պատգամավորները «սպառնացել» են Եվրախորհրդարանին' սեպտեմբերի 10-ի նիստում Ադրբեջանում մարդու իրավունքների խախտումների հետ կապված պատժամիջոցների կոչով բանաձեւ ընդունելու համար:

Ըստ «Թուրան»-ի, Եվրոպայի Խորհրդի Խորհրդարանական վեահաժողովում Ադրբեջանի պատվիրակության ղեկավար Սամեդ Սեիդովը հանդես է եկել ԵԽԽՎ «Եվրանեստ»-ում ադրբեջանական պատվիրակության գործունեությունը «սառեցնելու» առաջարկությամբ: Սեիդովն իր առաջարկությունը հիմնավորել է

ծիծաղելի անհրաժեշտությամբ' «Եվրախորհրդարանի շարքերում կոռուպցիայի բացահայտումով»: Ադրբեջանի խորհրդարանի խոսնակ Օքթայ Ասադովն էլ կառույցի արտահերթ նիստում հայտարարել է, թե միջազգային կազմակերպություների հետ Ադրբեջանի համագործակցությունը պետք է վերանայվի:

Ադրբեջանի Միլի Մեջլիսի արտահերթ նիստը հրավիրվել է հատուկ, որպեսզի պատասխան տրվի Եվրախորհրդարանի սեպտեմբերի 10-ի բանաձեւին: Այդ բանաձեւում քաղբանտարկյալներին ազատ արձակելու պահանջ է արտահայտվել, ինչպես նաեւ կոչ է արվել պատժամիջոցներ կիրառել բոլոր այն պաշտոնատար անձանց եւ դատավորների դեմ, որոնք հետապնդել են քաղաքական ակտվիստներին Ադրբեջանում:

Միջազգային եւ ադրբեջանական ԶԼՄ-ների համաձայն' ներկայում Ադրբեջանում մոտ 100 քաղաքական բանմտարկյալներ կան, այդ թվում' 20 «խղճի բանտարկյալներ»: