Շուրջ 150 գիտնականներ Երևանում կքննարկեն քիմիական տեխնոլոգիաների զարգացման հեռանկարները

Գիտություն և Մշակույթ 16 Սեպտեմբեր, 2015 0:22

Երևանում աշխարհի 7 երկրներ ներկայացնող 150 քիմիկոսներ կքննարկեն քիմիական տեխնոլոգիաների զարգացմանը վերաբերող հարցեր:

Սեպտեմբերի 15-ին մեկնարկած «Քիմիա և քիմիական տեխնոլոգիաներ» VI քառօրյա միջազգային գիտաժողովին հայ քիմիկոսների հետ կմասնակցեն նաև գիտնականներ ՌԴ-ից, Բելառուսից, Ուկրաինայից, Վրաստանից, Ղազախստանից և Ուզբեկստանից:

«Այս կոնֆերանսից իմ հիմնական ակնկալիքներն են' ցույց տալ, որ Հայաստանում քիմիայի նկատմամբ հետաքրքրությունները դեռ կորած չեն, ինչպես նաև գտնել այլ երկրներում գործող գիտնականների հետ համագործակցության ընդհանուր եզրեր: Մեր ինստիտուտի հիմնական գործունեությունը կապված է նոր նյութերի սինթեզի հետ, որոնք հնարավորություն կտան Հայաստանում վերականգնել նախկինում ակտիվ քիմիական արդյունաբերությունը», - նշեց ԳԱԱ Ընդհանուր և անօրգանական քիմիայի ինստիտուտի տնօրեն Նիկոլայ Կնյազյանը:

Գիտաժողովի մասնակիցները կներկայացնեն քիմիայի և քիմիական տեխնոլոգիաների զարգացման նոր ուղղություններն անօրգանական և արտադրական թափոնների համալիր վերամշակման տեխնոլոգիաների բնագավառում, նանոկոմպոզիտային, գերկարծր, հատուկ մաքրության, քիմիական արտադրություններ և շրջապատող միջավայրի էկոլոգիական խնդիրները և այլն:

«Այսօր առաջնահերթ հետազոտություններից են այնպիսիները, որոնք կարող են նպաստել մեր երկրների տնտեսությունների զարգացմանը, և այդ առումով նորարությունը առաջնահերթ պահանջն է գիտության նկատմամբ: Անօրգանական քիմիայի տեխնոլոգիաների հարցերը կարևոր են Հայաստանի համար, քանի որ մեր հայրենիքի ընդերքը հարուստ է բազում օգտակար հանածոներով», - ասաց ՀՀ ԳԱԱ նախագահ Ռադիկ Մարտիրոսյանը:

«Քիմիա և քիմիական տեխնոլոգիաներ» IV միջազգային գիտաժողովն անցկացվում է ՀՀ կրթության և գիտության նախարարության Գիտության պետական կոմիտեի և Երևանում Ռուսաստանի գիտության և մշակույթի կենտրոնի ֆինանսական աջակցությամբ, ՀՀ Գիտությունների ազգային ակադեմիայի, ՀՀ ԳԱԱ Քիմիական և երկրի մասին գիտությունների բաժանմունքի, Հայաստանի քիմիական ասոցիացիայի, ՀՀ ԳԱԱ Մանվելյանի անվան ընդհանուր և անօրգանական քիմիայի ինստիտուտի աջակցությամբ: