Գավառի կենտրոնական հրապարակի սալիկապատումը կկատարվի պետական միջոցների հաշվին

Գավառ քաղաքի կենտրոնական հրապարակի սալիկապատումը կընթանա պետբյուջեից տրամադրված միջոցների հաշվին:

ՀՀ կառավարության կողմից իրականացվող հրատապ ծրագրերի շրջանակներում կառավարության պահուստային ֆոնդից Գավառի կենտրոնական հրապարակի վերակառուցման աշխատանքները շարունակելու համար հատկացվել է 29 միլիոն 220 հազար դրամ: Այժմ կե նտրոնական հրապարակում շինարարական եռուզեռ է, իսկ վերջին 3 ամիսների ընթացքում այստեղ կատարվել են ավտոմատացված ոռոգման եւ էլեկտրական համակարգերի անցկացում, լուսասյուների համար նախապատրաստվել են բետոնե հիմքեր, սիզամարգերի տարածքները հողալցվել են, նախապատրաստվել ցանքի համար, որը կիրականացվի սեպտեմբերին: Հրապարակում տնկվել է 60 ծառ՝ 12 հատ արծաթափայլ եղեւնի, 20 հատ տուա եւ 18 հատ գնդաձեւ ակացիա. ծառերը ենթարկվում են ամենօրյա խնամքի:

Այս պահի տվյալներով' սալիկապատվել է ընդհանուր տարածքի շուրջ 500 քառակուսուսի մետրը: «Պետական միջոցներով տրամադրված գումարի հաշվին կսալիկապատվի Գավառի կենտրոնական հրապարակի ամբողջ մակերեսը, որը կազմում է մոտ 1000 քառակուսի մետր: Սալիկապատման աշխատանքները կավարտվեն այս տարվա ընթացքում»,-նշեց Գեղարքունիքի մարզպետարանի աշխատակազմի քաղաքաշինության վարչության ճարտարապետաշինարարական բաժնի վարիչ Արմեն Զոհրաբյանը: «Գավառի կենտրոնական հրապարակի շատրվանային համակարգի եւ կիսատ մնացած այլ աշխատանքների համար եկող տարվա ընթացքու մ քաղաքապետարանը պետք է գտնի նոր միջոցներ»,-հայտնեց Գավառի քաղաքապետարանի մամուլի քարտուղար Ալվարդ Մանուկյանը: