ԼՂ հակամարտության իրավական ու քաղաքական հիմքերը ներկայացված են քաղաքագետ Լևոն Մելիք-Շահնազարյանի երկհատոր գրքում

Հանրության դատին կներկայացվի քաղաքագետ Լևոն Մելիք-Շահնազարյանի ''О войне и победе'' (Պատերազմի ու հաղթանակի մասին) խորագրով գիրքը: Ռուսերեն երկհատորյակի շնորհանդեսը տեղի կունենա Երևանում սեպտեմբերի 26-ին: «Արմենպրես»-ի հաղորդմամբ՝ գիրքը նվիրված է տարածաշրջանային վերջին զարգացո ւմներին, հայ-ադրբեջանական հակամարտության պատմական, իրավական և քաղաքական առանձնահատկություններին:

Լևոն Մելիք-Շահնազարյանը ծնվել է 1958 թ. Կիրովաբադում: 1974թ. ընդունվել է Տաշքենդի Ռուսաց լեզվի և գրականության ինստիտուտ: 1988թ. Մելիք-Շահնազարյանը տեղափոխվել է Արցախ: Եղել է «Միացում» շարժման ղեկավարի տեղակալ: Նույն թվականի նոյեմբեր-դեկտեմբեր ամիսներին եղել է Գանձակում հայերի ինքնապաշտպանության ղեկավարներից մեկը: 1991թ. ընտրվել է ԼՂՀ Ազգային ժողովի պատգամավոր: 1992-1995թթ. ղեկավարել է ԼՂՀ Ազգային ժողովի արտաքին կապերի մշտական հանձնաժողովը, ինչպես նաև եղել է ԼՂՀ Ազգային ժողովի գերագույն խորհրդի նախագահության անդամ:

Լևոն Մելիք-Շահնազարյանը 1997թ-ին տեղափոխվել է Երևան, որտեղ զբաղվել է դասավանդմամբ և վերլուծական գործունեությամբ: Հեղինակել է ավելի քան 500 քաղաքագիտական վերլուծականներ և հոդվածներ: Նա ղեկավարում էր «Ոսկանապատ» վերլուծական կենտրոնը: Լևոն Մելիք-Շահնազարյանը երկարատև և ծանր հիվանդությունից հետո վախճանվել է 2015թ. օգոստոսի 11-ին: