Հայաստանը ձգտում է Ցեղասպանագետների միջազգային ընկերակցության հետ շարունակական համաժողովներ անցկացնել Երևանում

Ցեղասպանության հանցագործության դեմ միջազգային պայքարում Հայաստանի կարևոր դերակատարության ստանձնումը, 2015-ին իրականացված միջոցառումների արդյունքում, կարելի է հաջողված համարել: Հայոց ցեղասպանության 100-րդ տարելիցի միջոցառումները համակարգող հանձնաժողովի 6-րդ նիստի ժամանակ, որի բացումը կայացավ ՀՀ Նախագահի նստավայրում, հայտարարեց հանձնաժողովի գլխավոր համակարգող Վիգեն Սարգսյանը' հավելելով, որ, որպես ցեղասպանություն վերապրած ժողովուրդ, մենք պարտավոր ենք ակտիվ դերակատարում որդեգրել միջազգային հարթակում ցեղասպանությունների կանխարգելման գործում: «Մենք հայտարարեցինք, որ 2015-ին Հայաստանը վերածվելու է ցեղասպանության հանցագործության պայքարի միջազգային հարթակի: Կարծում եմ, որ այս ուղղությամբ մենք արձանագրեցինք կարևոր առաջընթաց: Հայաստանի ջանքերով ու առաջնորդությամբ ՄԱԿ-ում ընդունվեց կարևորագույն երկու փաստաթուղթ: ՄԱԿ-ի Մարդու իրավունքների խորհրդում ընդունվեց ցեղասպանության կանխարգելման մասին բանաձևը և ցեղասպանության հանցագործության զոհերի հիշատակի ու արժանապատվության և այդ հարցագործության կանխարգելման օր ճանաչելու բանաձևը: Ի դեպ' դրանից ամիսներ առաջ արդեն Հայաստանի Հանրապետությունն, իր ներքին օրենսդրությամբ, դեկտեմբերի 9-ը սահմանեց բոլոր ցեղապսանությունների զոհերի հիշատակի օր»,- «Արմենպրես»-ի հաղորդմամբ' ասաց Վիգեն Սարգսյանը:

Այս հարցում որպես կարևոր ձեռքբերում պաշտոնյան նշեց «Ընդդեմ ցեղասպանության հանցագործության» գլոբալ համաժողովի գրանցած հաջողությունը: Վիգեն Սարգսյանն առանձնահատուկ շեշտեց այն հանգամանքը, որ հարյուրավոր պատգամավորներ, հրապարակախոսներ, ցեղասպանագետներ, վերապրած ժողովուրդների ներկայացուցիչներ, հոգևորականներ բացահայտ խոսեցին այն մասին, որ Հայաստանից ակնկալում են առաջնորդություն ցեղասապանությունների կանխարգելման գործում: «Երևանյան գլոբալ ֆորումին պարբերական բնույթ հաղորդելու Հայաստանի Նախագահի հանձնարարականը կամրագրի մեր ուրույն դերակատարումը միջազգային հանրության շրջանակում»,- ավելացրեց Սարգսյանը:

Նա նաև ընդգծեց, որ աշխատանք է տարվում Ցեղասպանագետների միջազգային ընկերակցությանը, որի 12-րդ համաժողովն անցկացվեց Երևանում, դարձնել երևանյան հետագա համաժողովների համահիմնադիր: «Մենք շատ կարևորում ենք Ցեղասպանագետների միջագային ընկերակցության հետ հարաբերությունների խորացումը, Հայաստանում Հայոց ցեղասպանության թանգարան-ինստիտուտի ջանքերով ընկերակցության 12-րդ համաժողովի արդյունավետ անցկացումը, հետագա փոխգործակցության եզրերի ամրագրումը»,- ավելացրեց հանձնաժողովի համակարգողը:

Հայոց ցեղասպանության 100-րդ տարելիցի միջոցառումները համակարգող հանձնաժողովի 6-րդ նիստը բացվեց ՀՀ Նախագահի նստավայրում, ուր ներկաները լսեցին հանձնաժողովի գլխավոր համակարգող Վիգեն Սարգսյանի միջանկյալ հաշվետվությունը, որից հետո կատարվեց պարգևատրման արարողություն:

Նա նշեց, որ տարին դեռ ընթացքի մեջ է, կան բազմաթիվ պլանավորված միջոցառումներ, տարվա ամփոփման համար նախատեսվում է ամբողջական հաշվետվության պատրաստում և հրապարակում, ինչպես նաև լիամետրաժ վավերագրական ֆիլմի նկարահանում: