ԱԻ նախարարն ընդունեց Ճապոնիայի նորանշանակ դեսպանին

Նոյեմբերի 9-ին Արտակարգ իրավիճակների նախարար Արմեն Երիցյանն ընդունեց ՀՀ-ում Ճապոնիայի արտակարգ և լիազոր նորանշանակ դեսպան Տիկահիտո Հարադային։

Ողջունելով և շնորհավորելով դեսպանին նշանակման կապակցությամբ՝ Արմեն Երիցյանը նշեց, որ Արտակարգ իրավիճակների նախարարությունը ճապոնացի գործընկերների հետ երկար և արդյունավետ համագործակցության պատմություն ունի։ Նախարարը ներկայացրեց նախարարության կառուցվածքը և գործունեության հիմնական ուղղությունները։

ԱԻ նախարարն իր ցավակցությունը հայտնեց՝ կապված այս տարվա փետրվարին Ճապոնիայում տեղի ունեցած ուժեղ երկրաշարժի բազմաթիվ զոհերի հետ և նշեց, որ նման իրավիճակներում բոլոր երկրները պետք է սատար կանգնեն միմյանց։

«Ցանկանում եմ շնորհակալություն հայտնել Ձեր մեծ աջակցության համար, երբ 2010 թ.–ին Ճապոնիան Հայաստանին տրամադրեց 28 նոր հրշեջ մեքենա, ինչպես նաև՝ համատեղ իրականացվող ուսուցման և փորձի փոխանակման բոլոր ծրագրերի համար,- ավելացրել է ԱԻ նախարարը։

Շնորհակալություն հայտնելով շնորհավորանքների համար՝ դեսպան Հարադան նշեց, որ Հայաստանը և Ճապոնիան շատ անելիքներ ունեն արտակարգ իրավիճակների ոլորտում։ Մեր երկու երկրներին սպառնում են երկրաշարժեր. այսօր Ճապոնիայի միջազգային համագործակցության գործակալության (JICA) և ՀՀ արտակարգ իրավիճակների նախարարության մասնագետները միասին աշխատում են «Երևան քաղաքի սեյսմիկ ռիսկի գնահատման և կառավարման պլանավորման» ծրագրի վրա։ Ճապոնական կողմը մեծ նշանակություն է տալիս նաև սողանքների կանխարգելման և հետևանքների վերացման ոլորտում համագործակցությանը։

Դեսպան Հարադան ավելացրեց, որ Ճապոնիան բարձր է գնահատում այն փաստը, որ տրամադրված հրշեջ մեքենաները մեծ արդյունավետությամբ են օգտագործվում։

«Գիտեմ, որ Ռուսաստանում տեղի ունեցած անտառային հրդեհների ժամանակ Հայաստանը չորս հրշեջ մեքենա էր ուղարկել այնտեղ։ Մենք ուրախ ենք, որ մեր տրամադրած մեքենաներով կարողացել ենք օգնել նաև ռուս գործընկերներին։ Ապագայում ևս պատրաստ ենք դիտարկել համագործակցության նման տարբերակներ, - նշել է դեսպանը։

Ճապոնիայի նորանշանակ դեսպանն այցելեց նաև ԱԻՆ Ճգնաժամային կառավարման կենտրոն։ Նախարար Երիցյանը հանգամանալից ներկայացրեց կենտրոնի տեխնիկական հնարավորությունները, կառուցվածքն ու աշխատանքի սկզբունքները՝ ավելացնելով, որ ընդամենը երկու օր առաջ Ճգնաժամային կառավարման կենտրոնում տեղի ունեցավ առաջին ուղիղ հեռուստակոնֆերանսը Հայաստանի և Ճապոնիայի միջև։