Փողոցների փակում, սուլիչներ, մեծաքանակ ոստիկանություն. երթ դեպի Բ26 և նախագահական առանձնատուն

«Հիմնադիր խորհրդարանի» կամ Ժիրայր Սէֆիլյանի համախոհներիրց ձևավորված «Մենք ենք տերը մեր երկրի» նախաձեռնությունը մայիսի 13-ին պատրաստվում է բողոքի ակցիա-երթ իրականացնել։ Ուղղությունը՝ Բաղրամյան 26՝ Նախագահական նստավայր կամ Պռոշյան փողոցում նախագահական առանձնատուն։ 

Նախաձեռնության հեղինակները կոչ են անում մայիսի 13-ին ժամը՝ 18։00-ին հավաքվել Պռոշյան - Բաղրամյան խաչմերուկում, որտեղից էլ կորոշեն կոնկրետ որ ուղղությունով են երթ անելու։ Հիշեցնենք՝ նախորդ բողոքի ակցիան Ազատության հրապարակում էր, որտեղից նրանք պլանավորել էին երթ անել դեպի Բ26, սակայն ոստիկանությունը թույլ չտվեց՝ բերման ենթարկելով ակցիայի մասնակիցներին։ 

«Մեր նպատակն է, մեր հնարավորությունների սահմաններում, հանրային ճնշում գործադրել Բ26 վրա: Սա ենթադրում է մի քանի ուղղությամբ երթեր, մի քանի վայրում փողոցների փակում և այլն: Նման կազմակերպումը բերելու է շարժման մեջ մի քանի ինքնուրույն խմբերի ձևավորմանը: Ձեզ հետ ունեցեք սուլիչներ, ոստիկանների ապօրինություններին մենք պատասխանելու ենք սուլելով:

Մարզերի բնակչությանը կոչ ենք անում միանալ ակցիային, սակայն եթե այդ օրը չեք կարող գալ Երևան, առաջարկում ենք տեղում կազմակերպել քաղաքացիական անհնազանդության որևէ ակցիա, օրինակ՝ փակել որևէ մայրուղի կամ փողոց կամ այլ ձևով իրականացնել հանրային ճնշում: 

Մեզ փորձում են համոզել կամ վախեցնել, թե մեծաքանակ ոստիկանություն կա, որը ցուցարարներից 10 անգամ շատ է: Մի մոռացեք, որ ադրբեջանցիներն էլ են 10 անգամ շատ ուժերով գրոհել ապրիլի 1-ին մեր դիրքերի վրա, բայց մեր զինվորները չեն փախել՝ ասելով, որ 10 անգամ շատ են: Նրանք պահել են այդ սահմանը մեզ համար: Իսկ ինչ ենք մենք անելու նրանց համար...

Մեր ազգի սերուցքի մի մասն արտագաղթում է երկրից կամ զոհվում սահմանին: Իսկ մյուս մասը, որի կազմում ենք նաև մենք բոլորս, փորձում ենք ապրել մեր առօրյա կյանքով: Մենք դրա իրավունքը չունենք այս պահին, մենք դա այնքան ենք ուշացրել, որ այսօր մեր բոլորի ապագան է մշուշոտ դարձել:

Մենք այլևս վախենալու կամ կորցնելու բան չունենք: Այս երկիրը մերն է, ոչ թե օլիգարխներինը, ոչ թե 100-200 հաստավիզ ու անհայրենիք հանցագործներինը:

Մայիսի 13-ի ակցիայից հետո, մեր կազմը ընդլայնվելու է, և շարժման ամեն մի մասնակից կկարողանա ընդգրկվել հորիզոնական ձևով կառուցված մեր համակարգի օղակներում: Մարզերում ևս կփորձենք ձևավորել տեղական ժողովներ: Ամեն մի խելացի և հայրենասեր անհատ այսօր մեզ համար ավելի մեծ արժեք է, քանի քաղաքական որևէ գործիչ կամ պաշտոնյա»,- ասվում է նախաձեռնող խմբի տարածած հայտարարությունների մեջ։ 

Հավելենք, որ մայիսի 13-ի հավաքի կամ երթի վերաբերյալ Երևանի քաղաքապետարանը  դեռ իազեկում չի ստացել։ Փոխարենը քաղաքապետարանի կայքում հանդիպեցինք «Հիմնադիր խորհրդարանի» փոխնախագահ Վարուժան Ավետիսյանի կողմից մայիսի 6-ին, 9-ին, 10-ին և 11-ին Ազատության հրապարակում հավաք անցկացնելու, այնուհետև՝ Ազատության հրապարակ–Հյուսիսային պողոտա–Աբովյան փողոց–Հանրապետության հրապարակ–Ամիրյան փողոց–Մաշտոցի պողոտա–Ազատության հրապարակ երթուղով երթի անցկացնելու վերաբերյալ իրազեկման մասին տեղեկությունների։ 

Ք. Աղալարյան