Լապշինն Ինտերպոլի հաշվառումներով երբեք չի անցել

Բելառուսից Ադրբեջան արտահանձնված բլոգեր Ալեքանդր Լապշինն Ինտերպոլի հաշվառումներով երբեք չի անցել, միջազգային հետախուզման մեջ երբեք չի եղել:

Ոստիկանության լրատվության և հասարակայնության հետ կապերի վարչության պետ Աշոտ Ահարոնյանը ֆեյսբուքյան իր էջում զետեղել է ինտերպոլից ստացված գրությունը.

«Հարգելի գործընկերներ,

Մենք ստուգել ենք և հաստատում ենք, որ IPSG բազայում նման տեղեկություն առկա չէ: Ձեր հարցումը ուղարկվել է նաև Ինտերպոլի իրավաբանական վարչություն, հավելյալ տեղեկությունների դեպքում լրացուցիչ կտեղեկացնենք

ԻՆՏԵՐՊՈԼ-ի գլխավոր քարտուղարություն»,- ասվել է պատասխան նամակում:

Որպես Լապշինին Ադրբեջանին արտահանձնելու հիմք՝ Բելառուսի դատախազությունը ներկայացրել էր Ինտերպոլի կողմից հետախուզում հայտարարելը:

Բելառուսի Գերագույն դատարանը փետրվարի 7-ին մերժել է Ռուսաստանի և Իսրայելի քաղաքացի, բլոգեր Ալեքսանդր Լապշինի բողոքը՝ կապված Բելառուսի Գլխավոր դատախազության որոշման հետ, որով Լապշինը պետք է արտահանձնվի Ադրբեջան:

Լապշինը նույն օրը հատուկ չվերթով տեղափոխվել է Մինսկից Բաքու ' պետական անվտանգության ծառայության աշխատակիցների ուղեկցությամբ:

Ադրբեջանում ՌԴ և Իսրայելի քաղաքացի բլոգերին սպառնում է քրեական հետապնդում 281.2 (երկրի դեմ ուղղված հրապարակային կոչեր) և 318 (Ադրբեջանի Հանրապետության պետական սահմանի անօրինական հատում) հոդվածներով: Երկու հոդվածներով Լապշինին սպառնում է մինչև 5 տարվա ազատազրկում: