ՀԱԿ-ը դադարեցնում է ընտրությունների օրը փոխելու հարցը ՍԴ-ում քննարկելու ստորագրահավաքը

Ազգային ժողովի ՀԱԿ խմբակցությունը դադարեցնում է խորհրդարանական առաջիկա ընտրությունների օրը փոխելու հարցը Սահմանադրական դատարանում քննարկելու համար սկսած ստորագրահավաքը: Ազգային ժողովում խորհրդարանական ճեպազրույցների շրջանակներում լրագրողների հետ հանդիպմանը ԱԺ ՀԱԿ խմբակցության ղեկավար Լևոն Զուրաբյանը նշեց, որ անհրաժեշտ 27 ստորագրությունից հաջողվել է հավաքել ընդամենը 19-ը: «Պետք չէ ակնկալել, որ ստորագրահա վաքին նոր միացողներ կլինեն, քանի որ արդեն մի քանի օր մենք սկսել ենք այս գործընթացը, և եթե ստորագրել ցանկացողներ լինեին, մենք արդեն հավաքած կլինեինք անհրաժեշտ ստորագրությունները»,- նշեց Զուրաբյանը:

Նա հայտնեց, որ ընտրությունների օրվա հարցը ՍԴ-ում քննարկելու ձևաթղթի տակ ստորագրել են ՀԱԿ խմբակցության բոլոր պատգամավորները, 3 պատգամավոր ԲՀԿ խմբակցությունից, 2-ը՝ «Ժառանգություն» խմբակցությունից, «Համախմբում» կուսակցությունը ներկայացնող բոլոր 5 պատգամավորները և երկու անկախ պատգամավորներ՝ Էդմոն Մարուքյանն ու Խաչատուր Քոքոբելյանը:

Լևոն Զուրաբյանը հավելեց, որ այս գործընթացը բացահայտում է այն անձանց իրական դեմքը, ովքեր իրենց ընդդիմադիր են համարում, սակայն այն պահին, երբ պետք է աջակցեն ընդդիմության նախաձեռնությանը, հետ են կանգնում:

ԱԺ ՀԱԿ խմբակցությունը փետրվարի 6-ին մեկնարկած քառօրյա նիստի առաջին օրը հայտարարեց Ազգային ժողովի առաջիկա ընտրությունների օրը ՍԴ-ում քննարկելու համար ստորագրահավաք սկսելու մասին: Չնայած այն հանգամանքին, որ ԲՀԿ խմբակցության ղեկավար Նաիրա Զոհրաբյանը հայտարարել էր, որ ԲՀԿ-ն աջակցելու է ՀԱԿ-ի նախաձեռնությանը՝ խմբակցությունից ստորագրահավաքին միացել է ընդամենը երեք պատգամավոր՝ Նաիրա Զոհրաբյանը, Վահե Էնֆիաջյանը և Միքայել Մելքումյանը: