Սևազգեստ ծնողները կրկին կառավարության շենքի դիմաց էին. նրանք պահանջում են բացահայտել իրենց որդիների քրեական գործերը

Տարիներ շարունակ, անկախ եղանակային պայմաններից, սևազգեստ մայրերը, որոնց որդիները մահացել են ոչ մարտական պայմաններում, յուրաքանչյուր հինգշաբթի կառավարության շենքի դիմաց են՝ պահանջելով վերանայել իրենց որդիների գործերը և պատժել մեղավորներին: Այսօր՝ մարտի 16-ին ևս՝ նրանք այնտեղ էին:

ԼՈւՐԵՐ.com-ի թղթակցի հետ զրույցում 2010 թվականին Լեռնային Ղարաբաղում ոչ մարտական պայմաններում մահացած զինվոր Վալերի Մուրադյանի մայրը նշեց, որ մարտի 3-ին իրենց ընդունել է Պաշտպանության նախարար Վիգեն Սարգսյանը, սակայն ոչնչով չի օգնել իրենց. «Մենք դիմել էինք՝ բոլոր ծնողներիս միասին կանչի իր մոտ, բայց յուրաքանչյուրիս առանձին կանչեց: Մեզ ասաց՝ «Ես իրավասու չեմ ձեր քրեական գործերը բացահայտելու, ինչո՞վ կարող եմ ձեզ օգնել»: Իսկ ո՞վ է իրավասու, մեզ ինչո՞վ պետք է օգնի, մեր երեխաներին սպանողներին բացահայտելով, էլ ինչո՞վ: Նա պարտավոր է իմանալ՝ ինչ է կատարվում զորամասերում և ովքեր են զինվորներին սպանողները: Զինվոր է սպանվում զորամասերում, գեներալները տեղյակ չե՞ն»:

Սևազգեստ մայրերը նշում էին՝ իրենց երեխաների արյան վրա նստել-աթոռներն են տաքացնում ու ոչինչ չեն անում, եթե որևէ բան էլ անում են՝ հանրային ներկայացնում են՝ իբր աջակցել են: 

Նանա Մուրադյանը պատմեց՝ օրեր առաջ, երբ «Օսկանյան-Րաֆֆի-Օհանյան» դաշինքը Հոկտեմբերյանում քարոզարշավ էր իրականացնում, այն պահին, երբ անդրադարձել են բանակին, ինքը մոտեցել է նախկին ՊՆ Սեյրան Օհանյանին, վերջինս էլ հիշել է նրան. «Ես Սեյրան Օհանյանին ասացի՝ մինչ օրս չի բացահայտվել որդուս սպանությունը: Իսկ հիմա ասում է՝ «իշխանության գլուխ գամ՝ գիտե՞ք՝ ինչեր կասնեմ»: Սեյրան Օհանյանն ինձ ասաց, որ իր ենթակաները չեն ենթարկվել իրեն: Ինձ նման բան է ասում նախկին Պաշտպանության նախարարը, ինչ է, հիմա որ իշխանության գլուխ գա, պիտի ենթարկվե՞ն: Այնպես պիտի աներ, որ ենթարկվեին իրեն, ոչ թե մինչ օրս շարունակվի սպանդը՝ զինվորների կյանքեր խլելով»,- ասաց Նանա Մուրադյանը: