Անակնկալ՝ Պուտինից

Դատելով հյուսիսից հնչող ազդանշաններից՝ առաջիկայում Հայաստանի բնակչությանը կարող է հաճելի անակնկալ սպասվել. գազի գները կարող են իջնել:

Բանն այն է, որ շատերի համար անսպասելիորեն «Գազպրոմ»-ի ղեկավար Ալեքսեյ Միլլերը հայտարարել է, թե «Գազպրոմ»-ը կիջեցնի Հայաստանի համար գազի գները՝ պայմանով, որ գները կիջեցվեն նաև Հայաստանի տարածքում՝ հավելելով. «Մենք անցած տարվա դեկտեմբերին Հայաստանի Հանրապետության կառավարության հետ բանակցություններ անցկացրեցինք և հնարավոր դարձրեցինք 2017թ. գների արտոնյալ մակարդակի պահպանումը: Ընդ որում, համաձայնվեցինք, որ ՀՀ-ն կիջեցնի իր տարածքում սպառողների համար ներքին սակագինը»:

Այն, որ Ռուսաստանից Հայաստան մատակարարվող գազի գներն աշխարհում ամենաէժաններից են, փաստ է: Փաստ է նաև այն, որ Հայաստանի բնակչությունը, չգիտես ինչու կամ ինչպես, տարիներ շարունակ այդ նույն գազի համար վճարում է անհամեմատելի բարձր գին՝ գին, որը ոչ մի կերպ մարդկային առողջ տրամաբանության մեջ չի տեղավորվում: Չնայած շարունակ փորձեր են կատարվել ինչ-որ կերպ հինավորելու այս պարանորմալ երևույթը կամ գտնել այս ամենին ինչ-որ տրամաբանված պատասխան, սակայն դեռևս ոչ ոքի չի հաջողվել հիմնավոր կարծիք հնչեցնել: Արդյունքում՝ ոչ միայն տարիներ շարունակ շարքային հայաստանցին ստիպված է եղել անարդարության զոհ դառնալ, այլև էապես տուժել է նաև Հայաստանում Ռուսաստանի վարկանիշը, քանի որ շարունակաբար հնչել են կարծիքներ, թե իբր հենց «Գազպրոմն» է կանգնած այս մեքենայության հետևում, ու թե՝ ռուսները մեզ «քերում» են՝ թքած ունենալով, թե այդ ամենին ինչպես կարձագանքեն շարքային հայաստանցիները:

Միլլերի հայտարարությունը, սակայն, երկու բան է ցույց տալիս. առաջին՝ Միլլերը բնակչության համար գազի անբնական բարձր գինը բացահայտորեն պայմանավորում է Հայաստանի կառավարության անգործությամբ՝ որպես ստեղծված անբնական իրավիճակի սկզբնապատճառ հռչակելով վերջինիս անհետևողականությունն այնպիսի կարևորագույն հարցում, ինչպիսին՝ սոցիալական հսկայական նշանակություն ունեցող գազի հարցն է:

Երկրորդ՝ Ռուսաստանն այլևս վերանայում է իր մոտեցումներն այս հարցում՝ նախևառաջ ելնելով սեփական շահերից. Ռուսաստանի հեղինակության հարցը Հայաստանի բնակչության շրջանում Մոսկվայի համար ձեռք է բերում գեոպոլիտիկ կարևորագույն նշանակություն, քանի որ ՌԴ-ում շատ լավ հասկանում են, որ եթե կառավարությունների կամ վարչակազմերի հետ հնարավոր է ինչ-որ կերպ գալ համաձայնության՝ խնդիրների առկայության պարագայում, ապա՝ ժողովրդի շրջանում հետզհետե տարածվող խորը հիասթափության դեմ ոչ ոք ոչինչ չի կարող անել, ու մի օր կկանգնեն փաստի առաջ: Իսկ ինչ-որ մեկի անփութության կամ չափից դուրս ժլատության պատճառով սասանել սեփական դիրքերն Անդրկովկասում, Մոսկվայում ոչ ոք չի պատրաստվում:

Այնպես որ՝ դատելով ամենայնից՝ մեզ անակնկալներ են սպասվում՝ հաճելի անակնկալներ, որոնք ամենևին էլ ավելորդ չեն լինի սոցիալական առումով այս ծանրագույն ժամանակներում. Անբնական վիճակին պետք է վերջ դրվի:

Դավիթ ԲԱԲԱՆՈՎ