Հաղթեցին ուժեղագույնները, նրանք էլ կմասնակցեն աշխարհի առաջնությանը. Արտաշես Մադոյան

Ավարտվեց սուսերամարտի մինչև 20 տարեկան երիտասարդների Հայաստանի առաջնությունը:

Ֆեդերացիայի գլխավոր քարտուղար Արտաշես Մադոյանը ՀԱՕԿ լրատվականի հետ զրույցում նշեց, որ իրենց սպասելիքներն արդարացել են:

«Մեր բոլոր առաջատար սուսերամարտիկները հաղթեցին: Արդեն գիտենք' մարզիկներն ինչ հնարավորություններ ունեն: Մեր սպասելիքներն արդարացան, անակնկալներ չունեցանք: Ընդհանուր առմամբ՝ գոհ ենք»,-ասաց ֆեդերացիայի գլխավոր քարտուղարը:

Այժմ սուսերամարտիկները պատրաստվելու են Բուլղարիայում կայանալիք պատանիների եւ երիտասարդների աշխարհի առաջնությանը: Արտաշես Մադոյանը հայտնեց, որ Հայաստանի առաջնության արդյունքում ձեւավորվել է հավաքականի կազմը:

Գլխավոր ստուգատեսին կմասնակցեն 2 պատանի եւ 4 երիտասարդ:

Պատանիներից աշխարհի առաջնությունում հանդես կգան Արմեն Դալլաքյանն ու Անահիտ Ալոյանը (երկուսն էլ ճկասուսեր), իսկ երիտասարդներից' Էդուարդ Օվիկյանը, Ռազմիկ Վարդանյանը, Էմմա Պողոսովան (երեքն էլ խոցասուսեր) եւ Մայքլ Հովհաննիսյանը (ճկասուսեր):

«Հույս ունենք, որ մեր սուսերամարտիկները լավ հանդես կգան աշխարհի առաջնությունում եւ կկարողանան մի քանի փուլ անցնել: Սկզբից մասնակցելու են պատանիները, ապա երիտասարդները:

Պատրաստվածության այս մակարդակով դժվար է մրցանակային տեղ զբաղեցնել: Մինչեւ գլխավոր ստուգատեսը հավաքական թիմի հետ միասնական մարզումներ ենք անցկացնելու: Միջազգային ֆեդերացիան ամեն տարի աշխարհի առաջնությունից առաջ ուսումնամարզական հավաքներ է կազմակերպում՝ տարբեր երկրներից հրավիրելով մեկական մարզիկ: Հայաստանից այդ հավաքին կմասնակցի Էդուարդ Օվիկյանը»,-նշեց Արտաշես Մադոյանը:

Պատանիների աշխարհի առաջնությունը կկայանա ապրիլի 1-4-ը, իսկ երիտասարդներինը' ապրիլի 5-8-ը: