Ի՞նչ է փորձում ակնարկել դեսպանը...

Գալիք խորհրդարանական ընտրությունների աչքի ընկնող առանձնահատկություններից մեկը՝ ՀՀ-ում ԱՄՆ դեսպան Ռիչարդ Միլսի աննախադեպ ակտիվությունն է, որով վերջինս մտել է մեր ներքաղաքական և հատկապես՝ նախընտրական գործընթացների թնջուկի մեջ:

Դեսպան Միլսը կուսակցությունների գրասենյակներ է այցելում՝ քննարկելով նախընտրական մթնոլորտը և քաղաքական ուժերին այս օրերին հուզող հիմնական հարցերը: Եթե իրենց ընդդիմադիր հռչակած ուժերի գրասենյակներում Միլսը հիմնականում բողոքները լսողի դերում է, ապա իշխանության հասցեին նրա՝ այս կամ այն առիթով արված հայտարարությունները միանշանակ չեն:

Ընտրությունների համատեքստում նրա խոսքը հստակ է՝ պետք է լինեն ազատ, արդար, եւ թափանցիկ ընտրություններ, քաղաքացիները պետք է վստահություն ունենան արդյունքների նկատմամբ, ընտրողները չպետք է վախենան, որ իրենց քվեարկությունը հայտնի կդառնա, ընտրողներին կաշառել չի կարելի եւ այսպես շարունակ:

Սակայն այս բաժակաճառային նախադասությունների հետևում շատ ավելի լուրջ մեսսիջներ են թաքնված, որոնք ԱՄՆ փորձում է հասցնել դեսպանի միջոցով: ԱՄՆ-ն մտավախություն ունի, որ այս ընտրություններից հետո Հայաստանը վերջնականապես կարող է հայտնվել ՌԴ ազդեցության տիրույթում, հետևաբար ԱՄՆ-ն օր առաջ փորձում է «ձվի մեջ մազ գտնել»՝ հարկ եղած դեպքում ընտրությունների արդյունքները կասկածի տակ առնելու համար:

Սակայն դա անում է քողարկված մեսսիջների տեսքով՝ նաև բազմաթիվ «եթե»-ների: Եթե հաղթահարվի կոռուպցիան, կամ եթե արդար և թափանցիկ ընտրություններ անցկացվեն: Այսինքն, ի դեմս ԱՄՆ դեսպանի՝ արևմուտքը փորձում է խաղի որոշակի կանոններ հստակեցնել և ստանալ այդքան անհրաժեշտ երաշխիքները, որ ընտրությունների արդյունքում ՀՀ-ն ամբողջությամբ երես չի թեքի արևմտյան ինտեգրացիոն նախագծերից:

Մի բան ակնհայտ է, այն սանդղակը և չափորոշիչները որոնք ԱՄՆ-ն իր դեսպանի միջոցով սահմանել է ՀՀ խորհրդարանական ընտրությունների համար՝ դժվար թե հասանելի լինեն մեր ներքաղաքական իրականության պայմաններում: Հետևաբար ժողովրդավարության թեման այս պարագայում շահարկվում է աշխարհաքաղաքական նկատառումներից ելնելով: Ինչը թերևս հասկանում են գործընթացի մասնակից բոլոր կողմերը…

Ստելլա ԽԱՉԱՏՐՅԱՆ