IMH-ը 1 օրով դադարեցնում է քարոզարշավի լուսաբանումը

Հարգելի' ընթերցող,

երեկ անժամանակ իր մահկանացուն կնքեց հասարակության համար հոգեհարազատ դարձած Արթուր Սարգսյանը` «Հաց բերողը»:

Մարդկային վեհ հատկանիշների շնորհիվ` Արթուրը կարճ ժամանակում դարձավ մեր հայրենակիցների համար սիրելի կերպար: Որպես հաշվետվություն, պետք է ասենք, որ ուշի-ուշով հետևել ենք Արթուր Սարգսյանի շուրջ կատարվող իրադարձություններին և հանրությանը մատուցել նրա մասին համակողմանի տեղեկատվություն:

International Media Holding-ի կազմում գտնվող լրատվամիջոցներն այսօր՝ մարտի 17-ին, ողջ օրվա ընթացքում չեն անդրադառնա խորհրդարանական ընտրություններին ընդառաջ իրականացվող քարոզարշավին: 

Ցավակցում և մեր զորակցությունն ենք հայտնում Արթուրի հարազատներին, մտերիմներին, ընկերներին և սրտացավ մարդկանց:

Հիշեցում.

2016 թվականի հուլիսի 26-ին՝ առավոտյան ժամը 07։00-ի սահմաններում Արթուր Սարգսյանն իր անձնական մեքենայով ճեղքել է Էրեբունու ոստիկանական գումարտակի ոստիկանական պատնեշը և սնունդ է հասցրել այն գրաված և արդեն 10 օր այնտեղ գտնվող «Սասնա ծռերին»։ Նույն օրը «Հիմնադիր խորհրդարանը» տարածեց «Սասնա ծռերի» հայտարարությունը․ «Ոստիկանները բոլոր կողմերից կրակ են բացել Արթուրի մեքենայի վրա: Բարեբախտաբար, Արթուրը ոչ մի վնասվածք չի ստացել և բարեհաջող կերպով սնունդը տեղ է հասցրել»։

2016 թվականի հուլիսի 31-ին, «Սասնա ծռերի» կողմից զենքը վայր դնելուց և իրավապահներին հանձնվելուց հետո, Արթուր Սարգսյանը կալանավորվեց և նրան մեղադրանք առաջադրվեց ՀՀ քրեական օրենսգրքի 218 հոդվածի 3-րդ մասի 1-ին կետով (պատանդ վերցնելը) և 235 հոդվածի 3-րդ մասով (ապօրինի զենք զինամթերք ձեռք բերելը, իրացնելը, պահելը, փոխադրելը)։

Օգոստոսի 5-ին վերաորակավորվեց Արթուր Սարգսյանի մեղադրանքը, և նա մեղադրվեց զինված խմբի անդամներին օժանդակելու մեջ։

2016 թվականի դեկտեմբերի 30-ին Արթուր Սարգսյանը ազատվեց կալանքից:

2017 թվականի փետրվարի 9-ին կրկին ձերբակալվեց։

Երկրորդ ձերբակալության առաջին օրվանից Արթուր Սարգսյանն անժամկետ հացադուլ հայտարարեց, ինչի հետևանքով նրա առողջական վիճակը կտրուկ վատացավ՝ պատճառ դառնալով նրա մահվան: