«Հաց բերողին» մահվան դատապարտած դատավորն ու նրա մյուս զոհերը

Հուլիսյան իրադարձությունների ժամանակ ՊՊԾ գունդ «Սասնա ծռերի» անդամներին հաց հասցրած Արթուր Սարգսյանը՝ «Հաց բերողը» այլևս մեզ հետ չէ: Նա երեկ մահացավ «Արմենիա» բժշկական կենտրոնում՝ մարդկային անտարբերության հետևանքով: 

Դեռևս փետրվարին, երբ «Հաց բերողին» երկրորդ անգամ կալանավորեցին, նա իր ձեռքով նամակ էր գրել և տեղեկացրել՝ իր առողջական վիճակի հետագա վատթարացման համար մեղավոր ճանաչել ՀՔԾ քննիչ Հակոբյանին և Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի դատավոր Արթուր Մկրտչյանին, ով երկրորդ անգամ կալանավորման որոշում էր կայացրել՝ հաշվի չառնելով Արթուր Սարգսյանի հիվանդությունները և առողջական վատ վիճակը, որի մասին մամուլն ու Սարգսյանի փաստաբաններն ամեն օր հայտարարում էին: Ի դեպ՝ Արթուր Սարգսյանի ինքնազգացողությունը վատացել էր, երբ ՀՔԾ-ից հերթական ծանուցումն էր ստացել՝ հարցաքննության ներկայանալու համար: 

ԼՈւՐԵՐ.com-ը ներկայացնում է դատավոր Մկրտչյանի մասին կենսագրական մի քանի դրվագներ: Եվ այսպես՝ դատավոր Արթուր Մկրտչյանը նախկինում աշխատել է որպես քննիչ, ապա՝ դատախազ, որից հետո կտրուկ փոխել է ուղղությունը՝ նշանակվելով դատավոր: Այդ պաշտոնում նշանակվելուց անմիջապես հետո նա աչքի է ընկել բավականին աղմկահարույց գործերով կողմնակալ որոշումներ կայացնելով: 

«Հելսինկյան ասոցիացիա» իրավապաշտպան ՀԿ-ի և «Անկախ լրագրողների ցանց» ՀԿ-ի՝ տարիներ առաջ կատարած հրապարակումների համաձայն՝ նույն դատարանում այս դատավորի կողմից քննվել է 2010 թվականին ձերբակալված, 4 ավազակային հարձակում իրականացնելու մեջ մեղադրվող, այն ժամանակ՝ անչափահաս Արմեն Մարտիրոսյանի գործով դատական նիստը, ում մեղադրում են Կարեն Կարապետյանի և Պետրոս Հակոբյանի հետ 2009 թվականին կատարած մի շարք ավազակային հարձակումների մեջ: Նիստերը ուղեկցվել են բավական լարված պահերով: Մարտիրոսյանը հենց դատարանի դահլիճում ինքնասպանության փորձ է կատարել՝ այդ կերպ արտահայտելով իր բողոքը դատարանի կողմնակալ վերաբերմունքի դեմ: 

2011 թվականի փետրվարի 23-ին ձերբակալվել էր ԱԺ պատգամավոր Զարուհի Փսստանջյանի եղբայրը՝ Տիգրան Փոստանջյանը, ով աշխատում էր Արաբկիրի թաղապետարանի կոմունալ բաժնում: Ըստ մեղադրանքի՝ Տիգրան Փոստանջյանը, հանդիսանալով հանրային ծառայող, ապօրինի շինարարությանը չխոչընդոտելու համար Հ.Ս.-ից 2010թ. սեպտեմբերին պահանջել և ստացել է 100 000 դրամ վարձատրություն: Այս գործը ևս քննել է Արթուր Մկրտչյանը, ով Փոստանջյանին ազատազրկման դատապարտել՝ առանց դրա համար պատշաճ հիմնավորման առկայության: Հաշվի չի առնվել այն, որ Փոստանջյանը, պատահականորեն իմանալով քրեական գործի հարուցման մասին, անձամբ է ներկայացել հարցաքննության և որ իր խնամքի տակ ունի երկու մանկահասակ երեխա: Դատարանն անտեսել է նաև ներկայացված գրավի միջնորդությունն ու ԱԺ պատգամավորների կողմից տրված երաշխավորագրերը: 

Արթուր Մկրտչյանի նախագահությամբ քննված աղմկահարույց գործերից է եղել մայիսի 12-ին, Կոմիտասի պողոտայում՝ Խաչիկ Մկրտչյանին սպանելու կապակցությամբ հարուցված քրեական գործը:

Սկզբում սպանության հոդվածով մեղադրանք էր առաջադրվել Արաբկիրի նախկին թաղապետ Հովհաննես Շահինյանի քրոջ որդուն՝ Արսեն Ահարոնյանին, և այդ մեղադրանքով էլ քրեական գործն ուղարկվել էր դատարան: Համաձայն փաստաբան Գայանե Խաչատրյանի, դատաքննության ընթացքում դատավոր Մկրտչյանն իրավունքի շահերը պաշտպանելու փոխարեն՝ հանդես էր գալիս մեղադրողի կողմից, Վռամ Բաղդասարյանի դեմ ցուցմունք տվողներին հուշում էր պատասխանները կամ ուղղորդող հարցեր էր տալիս, մերժում էր պաշտպանական կողմի միջնորդությունները: Դատավորը Վռամ Բաղդասարյանին 14 տարվա ազատազրկման դատապարտեց:

Դատավոր Արթուր Մկրտչյանի նախագահությամբ բազմաթիվ գործեր են քննվել, որոնց վերջնական արդյունքը հարուցել է շատերի զայրույթը: Այս դատավորը հայտնի է իր կողմնակալ ու ոչ անաչառ որոշումներով, որոնք շատերի ճակատագրերն են կործանել: 

Ի դեպ՝ 2012 թվականին «Հելսինկյան ասոցիացիան» դիմել էր ԱՄՆ դեսպանատուն՝ խնդրելով մուտքի արտոնագիր չտրամադրել մի շարք դատավորների, ովքեր աչքի են ընկել օրինախախտումներով ու կամայական որոշումներով: Արթուր Մկրտչյանը հենց այդ դատավորների ցանկում էր: Թերևս այսքանը: Իհարկե, հույս ունենք, որ «Հաց բերողի» գործով բոլոր մեղավոր կողմերը, ովքեր անգործության են մատնված եղել,  այդ թվում՝ դատավոր Մկրտչյանը, պատասխանատվության կենթարկվեն: 

Արթուր Սարգսյանի հոգեհանգստի օրը դեռևս որոշված չէ, քանի որ վերջինիս փաստաբանները պահանջել են ստեղծել հանձնաժողով և դիահերձումն իրականացնել այդ հանձնաժողովի ներկայությամբ:

Հաց բերողի նամակը

 Քրիստինա Աղալարյան