Արթուր Սարգսյանի հիշատակին նվիրված բողոքի ակցիան ավարտվեց

Հուլիսյան իրադարձությունների ժամանակ ՊՊԾ գունդ «Սասնա ծռերի» անդամներին հաց հասցրած Արթուր Սարգսյանի՝ «Հաց բերողի» հիշատակին նվիրված բողոքի ակցիա-երթն ավատվեց։ Երթի անդամների և ոստիկանության ծառայողների միջև ընթացքում փոքրիկ բախումներ տեղի ունեցան, քանի որ ցուցարարները փորձում էին երթի ընթացքում փողոցներ փակել։ 

Ինչպես հաղորդում է ԼՈՒՐԵՐ.com-ի թղթակիցը, Կառավարության շենքի մոտ հասնելուց հետո ցուցարարները փորձեցին փակել Տիգրան Մեծի պողոտան, սակայն ոստիկանները նրանց բռնի ուժով դուրս բերեցին ճանապարհից։ Երևանի փոխոստիկանապետ Վալերի Օսիպյանը հայտարարեց, որ ոստիկանները ցուցարարների հետ գործողություններում գործել են բացառապես օրենքի շրջանակում և պահպանել են հասարակական կարգը։

Ի դեպ՝ ցուցարարների պահանջներից մեկը՝ Արդարադատության նախարար Արփինե Հովհաննիսյանի հրաժարականը, հանվում է, քանի որ, ըստ ակտիվիստների, նախարարությունը կամ նախարարը մարդու կալանքի տակ պահելու հետ անմիջական կապ չունի։

Այս պահին նրանց պայքարի օրակարգում է ՀՀ գլխավոր դատախազ Արթուր Դավթյանի հրաժարականը, ինչպես նաև՝ քրեական գործեր հարուցել Արթուր Սարգսյանին երկրորդ անգամ կալանավորելու միջնորդություն ներկայացրած քննիչի եւ այդ որոշումը կայացրած դատավորի նկատմամբ։

Ակցիայի մասնակիցները վաղը նույն ժամի՝ 18։00-ին կրկին հավաքվելու են Ազատության հրապարակում։ 

«Հաց բերողի» հոգեհանգիստը տեղի կունենա երեքշաբթի՝ մարտի 21-ին, ժամը՝ 18.00-ին, Շահումյանի գերեզմանատանը հարակից «Սան Լազար» սգո սրահում: Իսկ հուղարկավորությունը տեղի կունենա չորեքշաբթի օրը՝ մարտի 22-ին, ժամը 14.00-ին՝ նույն սրահից: