ՕՐՕ-ն գնում է վա-բանկ...

«Օհանյան-Րաֆֆի-Օսկանյան» դաշինքը հանդես է եկել խորհրդարանի ընտրության մասնակից ուժերին ուղղված առաջարկով՝ ԱԺ ընտրվելուց հետո ձևավորել Ազգային համաձայնության կոալիցիոն կառավարություն և ստորագրել դրա վերաբերյալ նախընտրական հուշագիր, իհարկե, բացառելով ՀՀԿ մասնակցությունը: Նման հայտարարությամբ հանդես գալը, այն էլ նախընտրական այս փուլում, բնականաբար ունի իր շարժառիթները:.

Առաջինը՝ ուշագրավ է այս հայտարարության համար ընտրված պահը: «Հաց Բերող»-ի մահը մեր հասարակության ներսում բավականին լարված իրավիճակ է ստեղծվել, առավել ևս, որ ՕՐՕ դաշինքի հայտարարության մեջ տեղ ունի հենց այդ հանգամանքը և դրանով իսկ «հասարակության համբերության բաժակի լցված լինելու» արձանագրումը: Դրան գումարվում է նաև նախընտրական լարվածությունը, որը առանց այդ էլ առկա էր օդում և արտահայտվում էր լոկալ բախումներով: Եղավ Ջրառատի հայտնի դեպքը, դրանից հետո բանտում գտնվող «Սասնա ծռեր»-ը իրենց աջակցությունը հայտնեցին ՕՐՕ-ին : Ընդամենը մի քանի օր առաջ ՕՐՕ-ի հոգաբարձու Սամվել Բաբայանի բոլորին սպառնում էր հետընտրական սրացումներով ու զինված բախումներով:

Արդեն իսկ որոշ աղբյուրներ ակնարկում են այն մասին, թե այդ բախումները միակ հնարավորությունն են ՕՐՕ-ի համար ԱԺ ընտրություններում մասնակից ընդդիմադիր ուժերի նկատմամբ զգալի առավելություն ձեռք բերելու տեսանկյունից՝ որպես իշխանությանն իրական ընդդիմություն ընկալվելու և վիճակը իր օգտին փոխելու համար։ Վ. Օսկանյանն ինքը «Սասնա ծռեր»-ի գործողությունների վերաբերյալ տարածած իր հայտարարության մեջ շեշտել էր, թե «Հայաստանում սկսվում է քաղաքական գործընթացի նոր փուլ՝ նոր, լեգիտիմ և գործունակ իշխանություն ձևավորելու նպատակով»:

Հավանաբար, այդ «նոր փուլը» հիմա ՕՐՕ-ն է շարունակում, ինչն այսօր դրսևորվում է ընտրություններին մասնակցելով և Ջրառատում տեղի ունեցած բախման դեպքերով: Այս ֆոնին դաշինքի շուրջ կարծես թե ռադիկալիզմի հսկայական շղարշ էր ձևավորվել, որը անկասկած անհրաժեշտ էր ցրել, հետևաբար՝ ՕՐՕ-ի այս հայտարարությունը միտված էր գործընթացները կառուցողական հուն տեղափոխելու իմիտացիա ստեղծելուն: Մինչդեռ կասկած անգամ չկա, որ ՕՐՕ-ն երկրում ծավալվող ցանկացած գործընթաց օգտագործելու է իշխանափոխության համար: Քննարկման առարկա հարց է նաև՝ դաշինքը պատրաստվո՞ւմ էր անել առաջարկությունը կամ կոչը՝ անկախ «Հաց բերող»-ի մահվան հանգամանքից, թե՞ հենց այդ հանգամանքն է դարձել հիմնական մոտիվը կամ խթանը:

Մյուս կողմից բավական ուշագրավ է այն փաստը, որ Ազգային համաձայնության կառավարություն կազմելու առաջարկը վերաբերվում է բոլոր ուժերին, բացառությամբ՝ ՀՀԿ-ի: Այս պարագայում  ՕՐՕ-ն փորձում է ընդգծել իր ընդդիմադիր լինելը և ստանձնել ընդդիմության միավորման դրոշակակրի դերը, ինչը, թերևս, դժվար իրականություն դառնա, հաշվի առնելով դաշինքի մարզային հանդիպումներին հավաքված մարդկանց սակավաթվությունը և Գելլափի հարցման արդյունքները, որոնց համաձայն՝ ՕՐՕ-ն հավաքելու է ընդհամենը ձայների 1,7 տոկոսը:

Դաշինքի վարած քաղաքականությունը և ընտրած նախընտրական մարտավարությունը այս փուլում թույլ է տալիս ենթադրել, որ ՕՐՕ-ի համար բուն նպատակը ոչ թե ընտրական գործընթացն է և արդյունքը, այլ ընտրական գործընթացը ընդամենը հետընտրական զարգացումների առիթ դարձնելը: Այս տեսանկյունից հետո ապրիլի 3-ը և հաջորդող ամիսները նույնպես կարող են հարուստ լինել իրադարձություններով: Մասնավորապես, ընտրություններից հետո ՕՐՕ-ն ջանալու է իր շուրջը հավաքել ընտրությունների արդյունքներից դժգոհ և իրենց «քցված» զգացող ուժերին, ինչի արդյունքում, հետընտրական պայքարը կարող է կրկին ռադիկալ երանգավորում ստանալ: Հաշվի առնելով ստեղծված ներքաղաքական իրավիճակը և այն տրամաբանությունը, որով այսօր ընթանում են նախընտրական գործընթացները՝ վերը նշված շղթայական գործողությունները բնավ պետք չէ բացառել…

Ստելլա ԽԱՉԱՏՐՅԱՆ