Սամվել Բաբայանը հարցաքննվել է և անհիմն է համարում այն, ինչի մեջ իրեն կասկածում են. մանրամասներ

Արցախի Պաշտպանության բանակի նախկին հրամանատար Սամվել Բաբայանը հարցաքննվել է: Ինչպես ԼՈւՐԵՐ.com-ի հետ զրույցում ասաց նրա փաստաբան Ավետիս Քալաշյանը, հարցաքննությունն ավարտվել է: «Սամվել Բաբայանը չի ընդունում այն, ինչի մեջ իրեն հասկածում են, նա դա համարում է անհիմն: Մեղադրանք կառաջադրվի, թե ոչ՝ այս պահին չեմ կարող ասել»,- մանրամասնեց փաստաբանը: 

Հիշեցնենք՝ ՀՀ ԱԱԾ-ն երեկ հայտարարություն էր տարածել և հաստատել Սամվել Բաբայանի ձերբակալման լուրը: Ըստ հաղորդագրության՝ կատարված քննչական գործողությունների և օպերատիվ-հետախուզական միջոցառումների արդյունքում ստացվել են նաև արժանահավատ տվյալներ, որ նշված զենիթա-հրթիռային համալիրի բաղկացուցիչ մասերի ձեռքբերումը և փոխադրումն իրականացրած անձինք գործել են Սամվել Բաբայանի հետ ունեցած նախնական համաձայնությամբ և նրա պատվերով։

Դեպքի առթիվ 2017թ. մարտի 22-ին ՀՀ Ազգային անվտանգության ծառայության քննչական վարչությունում ՀՀ քրեական օրենսգրքի 235-րդ 2-րդ մասի և 235.1-րդ հոդվածի 2-րդ մասի 1-ին կետի հատկանիշներով հարուցվել է քրեական գործ։

Հանցանք կատարելու մեջ անմիջականորեն ծագած կասկածանքի հիման վրա երկու անձ ձերբակալվել է

Ի դեպ՝ երեկ «Ժամանակ» թերթը գրել էր՝ իշխանությանը հայտնի է դարձել, որ մինչև ապրիլի 2-ը ՕՐՕ դաշինքի ստվերային առաջնորդ Սամվել Բաբայանը «Սասնա ծռեր-2» գործողություն է ծրագրում։ Իշխանությանը ամենայն մանրամասնությամբ հայտնի է ամբողջ ծրագիրը, բայց որևէ գործողության չեն դիմում, որևէ մեկին չեն ձերբակալում, որպեսզի ընտրության ընթացքում ՕՐՕ-ի ռեյտինգը չավելացնեն։ Սակայն վիճակը գնալով այնքան է լարվում, որ չեն բացառվում ԱԱԾ-ի կողմից կտրուկ քայլեր և գործողություններ՝ ընդհուպ կալանավորումներ: 

Նշենք, որ Արցախի ԱԺ պատգամավոր Հայկ Խանումյանի կարծիքով՝ Բաբայանի ձերբակալման օրը պատահական ընտրված չէր: «2000 թվականի մարտի 22-ին նախագահ Արկադի Ղուկասյանի դեմ մահափորձ տեղի ունեցավ, որի գիշերը ձերբակալեցին Սամվել Բաբայանին: Բաբայանին խաղից հանելու գործընթացը հենց 2000թ. մարտի 22-ին էր սկսվել»,- մեզ հետ զրույցում ասել է նա:

Քրիստինա Աղալարյան