Արցախցի հրամանատարը՝ Սամվել Բաբայանի ձերբակալության և Տեր-Պետրոսյանի հարցազրույցի մասին

ԼՂՀ ինքնապաշտպանական բանակի 1-ին հրամանատար Արկադի Կարապետյանն, ով զինակիցների շրջանում առավել հայտնի է Ագո մականվամբ, ԼՈւՐԵՐ. com-ի հետ զրույցում խոսելով ԼՂՀ պաշտպանության նախկին նախարար, գեներալ–լեյտենանտ Սամվել Բաբայանի ձերբակալության և նրան առաջադրվող մեղադրանքի մասին, նշեց. «Ես Սամվել Բաբայանի մասին չեմ ուզում որևէ բան ասել, այս պահին ճիշտ չէ նաև նրան առաջադրված մեղադրանքի մասին կարծիք հայտնելը, որովհետև ես դա ասելու հնարավորություն ունեմ, ինքը՝ ոչ: Նա ձերբակալված է, խոսելու և իր դիրքորոշումը հայտնելու հնարավորություն չունի, դրա համար էլ կսպասեմ մինչև նա ազատվի, նոր կհայտնեմ իմ տեսակետը»: 

Դիտարկմանը, որ ազատամարտիկներից ոմանք անհեթեթություն են համարում պաշտոնական մեղադրանքը, թե նա փորձել է Հայաստան «Իգլա» բերել, Արկադի Կարապետյանը պատասխանեց. «Ցանկացած մարդ, ով ունի հնարավորությունները, կարող է նման զենք  բերել Հայաստան, դա խնդիր չէ: Այնպես չէ, որ սահմաններում այնպիսի վիճակ է, որ հնարավոր չէ՝  քաղաքացին կարողանա «Իգլա» կամ այլ զինատեսակ անցկացնել Հայաստան: Իհա՛րկե, իմ խոսքը բացարձակապես չի վերաբերում Սամվել Բաբայանին»: 

Հարցին՝ ի՞նչ են խոսում Արցախում Սամվել Բաբայանի ձերբակալման մասին նրա զինակիցներն ու արցախցիները, մեր զրուցակիցը պատասխանեց. «Վերաբերմունքներն ու կարծիքները շատ տարբեր են: Կան նաև տարբեր խոսակցություններ Բաբայանի ձերբակալության մասին: Բոլորս էլ կսպասենք՝  թող Սամվել Բաաբյանը դուրս գա, նոր կխոսենք: Պատրաստ ենք մեր տեսակետների և դիրքորոշումների մասին խոսել նաև հեռուստաեթերով»:

Արցախում ապրող հրամանատարից փորձեցինք ճշտել նաև տրամադրություններն Արցախում՝ Լևոն Տեր-Պետրոսյանի վերջին հարցազրույցի հետ կապված:

Արկադի Կարապետյանը նշեց, որ Արցախ աշխարհի համար նորություն չէին ՀՀ առաջին նախագահի անընդունելի տեսակետները, սակայն արցախցին երբեք չի ընդունի դրանք՝ որպես ի գիտություն .«Լևոն Տեր-Պետրոսյանը մշտապես էլ ասել է, որ Արցախը պետք է հանձնվի Ադրբեջանին: Արցախցիների համար մեկ է, թե դա ով է ասել՝ նախագա՞հ, նախկի՞ն նախագահ, թե՞ որևէ այլ մարդ, մենք դա մերժում ենք: Արցախցիները պնդում են՝ հող հանձնելով խաղաղություն չի գա, Արցախը հանձնելուց հետո հաջորդը կհանձնենք Զանգեզուրը, իսկ վերջում՝ մեր տները»:  

Արկադի Կարապետյանն ասաց, որ թեև ժամանակին Արցախում կային Տեր-Պետրոսյանի տեսակետներն ընդունող մի քանի հոգի, բայց ապրիլյան դեպքերից հետո դրանք էլ չկան: «Տեր-Պետրոսյանի՝ հողեր տալու տեսակետը կիսողներն Ապրիլյան պատերազմի օրերին հասկացան, որ ո՛չ ռուսը, ո՛չ խաղաապահ ուժերը չեն կարող իրենց օգնել,  դրանք հեքիաթներ են: Հիմա էլ՝ Տեր Պետրոսյանի առաջարկները մենք հեքիաթներ ենք համարում: ՀՀ առաջին նախագահը նման հայտարարություններով ուզում է մեր զգոնությունը թուլացնել, ինչը նրան չի հաջողվի. արցախցիների համար դրանք մերժելի են»: 

Աղավնի Սուքիասյան