«ՍԱՍ-ի Արտակի» վերաբերյալ ձայնագրությամբ հանդերձ՝ ՀԱԿ-ը կդիմի սահմանադրական դատարան

ՀՀ ԱԺ-ում խորհրդարանական խմբակցությունների՝ ապրիլի 14-ի ճեպազրույցների ժամանակ ՀԱԿ խմբակցության պատգամավոր Արամ Մանուկյանը խոսեց խորհրդարանական ընտրությունների մասին: Վերջինս տեղեկացրեց, որ այսօր, ժամը 16.00-ին դիմելու են Սահմանադրական դատարան՝ ընտրախախտումների մասին հստակ փաստարկներ ներկայացնելով:

Արամ Մանուկյանն անդրադարձավ այսօրվա թիվ 1 թեմային՝ ԱԺ ՀՀԿ խմբակցության պատգամավոր Արտակ Սարգսյանի նախընտրական ձայնագրությանը, որտեղ պատգամավորին պատկանող ընկերությունների աշխատակիցներին ստիպում են Արտակ Սարգսյանի համար ձայներ հավաքել, սպառնալով, որ հակառակ դեպքում աշխատանքից կհեռացվեն: «Այսօր մենք կդիմենք սահմանադրական դատարան, հավաքել ենք բավականաչափ նյութեր: Արաբկիր համայնքում  ընտրողների ամեն չորրորդը կույր է եղել: Այն տեղամասում, որտեղ առաջադրվել է Արտակ Սարգսյանը, մարդիկ քվեարկության ժամանակ օգնության կարիք են ունեցել, կույր են եղել՝ չեն կարողացել քվեարկել և նրանց օգնության են հասել իշխանական դիտորդները»,-նշեց Արամ Մանուկյանը՝ հավելելով, որ վստահ է, որ բոլոր ներկաները նայել են երեկվա «կինոն»: 

«Արտակ Սարգսյանի աշխատողների վրա ճնշումը և երեկվա ձայնագրությունը ներկայացնելու ենք այն փաթեթում, որը պատրաստվում ենք ներկայացնել Սահմանադրական դատարան»,- ասաց Մանուկյանը

ԼՈւՐԵՐ.com-ի հարցին՝ համացանցում հայտնված ձայնագրությունն արդյոք կարո՞ղ է պատճառ դառնալ, որ այն ընտրատարածքներում, որտեղ առաջադրվել է Արտակ Սարգսյանը, նորից անցկացվեն ընտրություններ, Արամ Մանուկյանը պատասխանեց. Եթե այս դեպքը միակը լիներ, հնարավոր էր նման բանի մասին խոսել, բայց սա միակ դեպքը չէ, քաղաքացուն ստորացնելու նման դեպքերը բազմաթիվ են, հետևաբար, անիմաստ է նորից ընտրություն անցկացնելը»:

«Թե Ինչու հիմա հրապարակվեց Արտակ Սարգսյանի մասին այս ձայնագրությունը, չեմ կարող ասել: Ես չգիտեմ՝ ով է հեղինակը: Նման ձայնագրություններ էլի կլինեն: Էս 45 հազարանոց տղերքը դեռ ջրի երես կելնեն: Այն, որ իշխանության ներսում գզվռտոց է և շատ ձայն հավաքածները կարող են դիմում գրել և դուրս գալ, փաստ է: Թող էսպես իրար ուտեն, իրար կրծեն: Արժանի են իրար»,-ասաց ՀԱԿ պատգամավոր Արամ Մանուկյանը:

Արամ Մանուկյանի բնորոշմամբ՝ ամենաուշագրավն այն է, որ հոգեբուժարանում են 100 տոկոսով քվեարկել ՀՀԿ-ի օգտին. «Կայֆ է. բոլոր հոգեկան հիվանդները քվեարկել են իշխող ուժի օգտին: Թրամփը կնախանձեր մեր 45 հազարանոց տղերքին: Զավեշտն այն է, որ նրան անգամ հինգ տարի ԱԺ-ում աշխատող պատգամավորները չեն ճանաչում»:

Աղավնի Սուքիասյան