Գլխավոր դատախազությունն ու Ոստիկանությունը՝ «ՍԱՍ-ի Արտակի» աղմկահարույց ձայնագրության մասին (թարմացված)

Երեկ համացանցում հրապարակվեց աղմկահարույց ձայնագրություն, որն արվել է ընտրություններից առաջ՝ ՀՀԿ-ական պատգամավոր Արտակ Սարգսյանին՝ «ՍԱՍ-ի Արտակին» պատկանող SAS գրուպում անցկացված ժողովի ժամանակ:

Ձայնագրությունից պարզ է դառնում, որ ընկերության աշխատակիցներին ստիպում են Արտակ Սարգսյանի համար ձայներ հավաքել, սպառնալով, որ հակառակ դեպքում աշխատանքից կհեռացվեն: Ձայնագրության մեջ՝ ընկերության աշխատակիցը, ով հավանաբար SAS-ի Արտակի աջ ձեռքն է, հատ առ հատ ստուգում է ցուցակում իրենց աշխատակիցների անուններն ու նրանց բերած ձայների քանակը: 

Առավելագույն ձայներ բերած առաջին երեք աշխատակիցները Արտակ Սարգսյանի կողմից կստանան ուղևորություն դեպի Փարիզ: Այն աշխատակիցները, ովքեր ձայն չեն ներկայացրել, նախատինք ստացան ու սպառնալիք՝ աշխատանքից հեռացվելու: Մոտ 40 րոպե տևողությամբ ձայնագրությունը բացահայտում է ընտրությունների ամբողջ պատկերը, որը սարսափելի է:  

ՀՀ գլխավոր դատախազությունն ուսումնասիրում է «ՍԱՍ» գրուպի աշխատակիցների հետ անցկացված ժողովի աղմկահարույց ձայնագրությունը: Այս մասին ԼՈւՐԵՐ.com-ին փոխանցեցին դատախազության հանրային կապերի բաժնից:

ԼՈւՐԵՐ.com-ի հետ զրույցում ՀՀ ոստիկանության հասարակայնության հետ կապի և լրատվության բաժնից պատասխանեցին. «Այս պահին դեռ ոչ մի քայլ չի ձեռնարկվել»: 

Արտակ Սարգսյանն առաջադրվել էր թիվ 2 ընտրատարածքում, որն ընդգրկում է Արաբկիր, Աջափնյակ և Դավթաշեն վարչական համայնքները: Վերջինս հավաքել էր 12 հազար ձայն: Ի դեպ՝ ընտրություններից անմիջապես հետո Արտակ Սարգսյանը մեզ հետ զրույցում հայտարարել էր, թե գոհ է ընտրությունների արդյունքներից:

Քրիստինա Աղալարյան