ՍԱՍ-ի Արտակին կձերբակալե՞ն...

Երեկ «Hayastan24.com» կայքը հրապարակել է սկանդալային ձայնագրություն, որտեղ «ՍԱՍ» գրուպի ղեկավարներից մեկը նախընտրական ժողովի է հրավիրել ընկերության աշխատակիցներին։  Թեև այն սկանդալային անվանելը փոքր ինչ չափազանցություն է՝ որևէ մեկի համար երբեք գաղտնիք չի եղել, թե հայտնի օդիոզ դեմքերը ինչպիսի մեթոդներով են հասնում այդքան բաղձալի մանդատներին:

Ձայնագրության մեջ տեղ են գտել կոնկրետ անուններ՝ ցուցակ կազմող-բերողների ու հարակից ատրիբուտների մասով: Տխուր ձայնագրություն է, որն արտացոլում է նախընտրական ու բուն ընտրական այն արատավոր մեխանիզմը, որի գործադրմամբ՝ այս անգամ էլ կեղծվել են ընտրությունները: «Երկիրը երկիր չի», «քաղաքացին էլ՝ քաղաքացի» պիտակային որակումներից վերացարկվելով՝ նշենք, որ այս առումով ամենատարբեր կարծիքներ հնչեցին:

Մարդկանց մի զգալի մասն, իհարկե, վրդովվեց, մյուսները՝ կատաղեցին, երրորդները՝ զարմացան, չորրորդները՝ որևէ կերպ չվերաբերվեցին: Միևնույն ժամանակ՝ պետք է փաստել, որ մեր քաղաքական մշակույթի համար այս ամենը դարձել է նորմալ, հանրության մեջ տեղ գտան բոլոր զգացմունքները, բացի մեկից՝ զարմանքից: Ինչու՞ սա հնարավոր եղավ։ Որովհետեւ մենք մեզ սովորեցրինք վճարովի հնազանդությանը։ Մեզ ասեցին, որ արժանապատվությունը չի վճարվում, ով էլ որ դու լինես։

Վճարվում է հնազանդությունը։ Վճարվում է, որովհետեւ մեզ դու պետք չես, մեզ պետք է քո հնազանդությունը, որով դու ոչ թե ՍԱՍ-ի սուպերմարկետներից մեկում վաճառող-խորհրդատու ես, այլ մեր անպատժելիության հենարանը։ Մեզանով են կառուցել իրենց անպատժելիության ամրոցները, 200 հոգի հավաքել են մի տեղ, չեն էլ ենթադրում, որ գոնե մեկը ստրուկ չի լինելու (հանձին ձայնագրողի)։ «Շնորհակալության» զգացումն է բոլորին կապում Հանրապետականի հետ։ Իսկ թե ինչ «շնորհակալության» մասին է խոսքը, հրաշալի բեմականացված է ՍԱՍ-ի սեփականատեր Արտակ Սարգսյանի քվեների ժողովում։

Այն բոլոր ուժերը և անհատները, ովքեր կեղծարարության ապացույցներ էին պահանջում և պախարակում ընտրությունների արդարությունը կասկածի տակ դնողներին, այժմ ունեն այդ ապացույցը: Ապացույցը պոզով-պոչով է լինո՞ւմ: Այժմ հանրությունը սպասում է: Սպասում է, որ աշխարհը և իրեն փոխել պատրաստվող իշխանությունները բարեհաճեն բացատրություններ տալ:

Եթե սույն ձայնագրության առնչությամբ հարուցվի քրեական գործ, ապա մեղավորներին սպառնում են Քրեական Օրենսգրքի հետևյալ հոդվածները. Հոդված 149. Ընտրական իրավունքի իրականացմանը կամ ընտրությանը մասնակցող անձանց լիազորությունների իրականացմանը խոչընդոտելը։ Պատժվում է ազատազրկմամբ՝ երեքից մինչև հինգ տարի ժամկետով.Պատժվում է ազատազրկմամբ' երեքից մինչև հինգ տարի ժամկետով:Հոդված 154.2. Ընտրողի կողմից թեկնածուներից, կուսակցություններից (կուսակցությունների դաշինքներից) կողմից ընտրողներին կաշառք տալը կամ ընտրողի ազատ կամքի իրականացմանը խոչընդոտելը։ Պատժվում է տուգանքով' նվազագույն աշխատավարձի հինգհարյուրապատիկից յոթհարյուրապատիկի չափով, կամ ազատազրկմամբ' մեկից երեք տարի ժամկետով:

Եթե նման խայտառակությունը նույնպես «ծածկադմփոց արվի», ապա միանշանակ կարող ենք ասել՝ ունենք իշխանություններ, որոնք հմուտ են միայն բաժակաճառերում: Արդյո՞ք ՍԱՍ-ի արտակների նմաններն են պատրաստվում ապահովել մեր անվտանգությունը և առաջընթացը....

Մի կողմ դնելով հարցի բարոյական և քաղաքական կողմը, սա նաև քրեորեն հետապնդելի արարք է՝ ընտրողների ազատ կամքի նկատմամբ ճնշման փաստի հիմքով: Հետևաբար, ակնկալվում է նաև տեղի ունեցածի իրավական գնահատականը: Դրա հիման վրա էլ հանրությունը կորոշի՝ հավատա՞լ, թե՞ ոչ աշխարհը փոխել խոստացողներին…

Ստելլա ԽԱՉԱՏՐՅԱՆ