Կոալիցիայի գլխավոր նպատակը...

ՀՀԿ-ն նոր ԱԺ-ում ցանկացած որոշում չի կարող անցկացնել, նոր Սահմանադրությունը դա թույլ չի տալիս. «Դրա համար կա որոշումների մի ծավալ, որոնց համար այլ թվաքանակ է անհրաժեշտ: Այս մասին, այսօր՝ ապրիլի 14-ին, լրագրողների հետ զրույցում նշել է ԿԳ նախարար Լեւոն Մկրտչյանը:

Կլասիկ քաղաքական տրամաբանության տեսանկյունից ՀՀԿ-ն ասպարեզում առկա որևէ ուժի հետ կոալիցիա կազմելու անհրաժեշտություն չպետք է ունենար: Այն պահպանում է քաղաքական մեծամասնության կարգավիճակը, կատարելապես վերահսկում է իրավիճակը, ինչն ապացուցվեց նաև Սահմանադրական փոփոխությունների գործընթացն առանց լուրջ ցնցումների ցանկալի հանգրվանի հասցնելու իրողությունը, հանդիսանում է քաղաքական օրակարգ թելադրող ուժը, և առկա չէ քաղաքական ճգնաժամի որևէ նախանշան:

Չնայած դրան՝ ՀՀԿ-ն ՀՅԴ-ին առաջարկում է կոալիցիա կազմել, որի մասին հայտարարությունը հնչում է ոչ թե ՀՀԿ-ից, այլ առաջարկը ստացող ուժից:  Ընդ որում, ՀՀԿ փոխնախագահ Արմեն Աշոտյանը մեկ այլ ուշագրավ խոստովանություն է արել. «Նոր Սահմանադրությամբ, մի շարք կարևորագույն օրենքներ պահանջում են նոր քանակական ցենզ՝ երեք հինգերորդ, դա նշանակում է առնվազն 60 տոկոս ձայն: Հետևաբար, կա նաև, որոշ դեպքերում, նման համագործակցության սահմանադրական պահանջ»:

Այսինքն՝ ստացվում է, որ ՀՀԿ-ն ՀՅԴ-ի հետ համագործակցության է գնում ստիպված, որպեսզի հարկ եղած դեպքում կարողանա ԱԺ-ում քվեարկությունների ժամանակ համապատասխան չափով ձայներ ստանալ, այլապես՝ չէր դիմի այդ քայլին: Թե՛ Աշոտյանի, թե՛ Մկրտչյանի հայտարարությունները դրա մասին են վկայում:

Հարկ է նշել նաև, որ որոշ հարցերի դեպքում պահանջվում է պատգամավորների երկու երրորդի համաձայնությունը. խոսքը, օրինակ, սահմանադրությունում որոշ հոդվածների փոփոխության մասին է: Իսկ այս դեպքում ՀՀԿ-ին անհրաժեշտ կլինի 70 կոճակ սեղմող: Ու այս դեպքում իշխանական 63 մանդատները չեն օգնի: Հետաքրքիր է, հիմա՞ էլ են կոալիցիոն գործընկերները խոսելու արժեհամակարգային նմանությունների և բովանդակային համագործակցության մասին…

Ստելլա ԽԱՉԱՏՐՅԱՆ