Հայաստանն ամենաանվտանգ երկրների ցանկում 34-րդն է. «Համաշխարհային տնտեսական ֆորում»-ը հրապարակել է ամենամյա զեկույցը

«Համաշխարհային տնտեսական ֆորում» կազմակերպությունը հրապարակել է ամենամյա զեկույցը, որում ներկայացրել է անվտանգության, բիզնես միջավայրի, տուրիզմի, առողջապահության, բնական ռեսուրսների, մարդկային ռեսուրսների ու աշխատանքային շուկայի և մի շարք այլ բաղադրիչներով 136 երկրի վարկանիշը:

Ամենաանվտանգ երկրների ցանկում Հայաստանը զբաղեցրել է 34-րդ հորիզոնականը: Աղյուսակը գլխավորում է Ֆինլանդիան, որին հաջորդում են Արաբական Միացյալ Էմիրությունները, Իսլանդիան, Օմանը, Հոնկոնգը, Սինգապուրը, Նորվեգիան, Շվեյցարիան, Ռուանդան, Կատարը, Պորտուգալիան, Լյուքսեմբուրգը, Նոր Զելանդիան, Ավստրիան, Էստոնիան, Շվեդիան, Սլովենիան, Իսպանիան և այլն:

Հայաստանի հարևան երկրներից Իրանն անվտանգության առումով 87-րդն է, Վրաստանը' 29-րդը, Թուրքիան' 116-րդը: Անվտանգության մակարդակի բաղադրիչով աղյուսակում բավականին հետ է Ռուսաստանը, որը 109-րդն է:

Տուրիզմի բաղադրիչով Հայաստանը «Համաշխարհային տնտեսական ֆորում»-ի հրապարակած աղյուսակում 84-րդն է: Աղյուսակը գլխավորում է Իսպանիան, որին համապատասխանաբար հաջորդում են Ֆրանսիան, Գերմանիան, Ճապոնիան, Միացյալ Թագավորությունը, ԱՄՆ-ը, Ավստրալիան, Իտալիան, Կանադան, Շվեյցարիան, Հոնկոնգը, Ավստրիան, Սինգապուրը, Պորտուգալիան, Չինաստանը, Նոր Զելանդիան և այլն: Զբոսաշրջության բաղադրիչով Հայաստանի հարևան Վրաստանը 70-րդն է, Ադրբեջանը' 71-րդը, Իրանը' 93-րդը, Թուրքիան' 44-րդը: Ռուսաստանը տուրիզմի բաղադրիչով աղյուսակի 43-րդ հորիզոնականում:

Բիզնես միջավայրի բաղադրիչով Հայաստանը կազմակերպության հրապարակած վարկանիշային աղյուսակում 39-րդն է: Աղյուսակը գլխավորում է Հոնկոնգը, որին համապատասխանաբար հաջորդում են Սինգապուրը, Շվեյցարիան, Միացյալ Թագավորությունը, Արաբական Միացյալ Էմիրությունները, Կատարը, Լյուքսեմբուրգը, Նոր Զելանդիան, Ֆինլանդիան, Նորվեգիան, Իռլանդիան, Բահրեյնը, Նիդեռլանդները, Դանիան և այլն: Հայաստանի հարևան Վրաստանը բիզնես միջավայրի բաղադրիչով 22-րդն է, Թուրքիան' 63-րդը, Ադրբեջանը' 57-րդը, Իրանը' 79-րդը:

Առողջապահության բաղադրիչով կազմակերպության հրապարակած վարկանիշային աղյուսակում Հայաստանը 48-րդն է: Աղյուսակը գլխավորում է Գերմանիան, որին համապատասխանաբար հաջորդում են Լիտվան, Ավստրիան, Բելգիան, Ռուսաստանը, Ղազախստանը, Չեխիան, Ուկրաինան, Հունգարիան, Բուլղարիան, Հունաստանը, Հոնկոնգը, Շվեյցարիան, Ֆրանսիան և այլն: Հայաստանի հարևան Վրաստանը 36-րդն է, Ադրբեջանը' 37-րդը, Թուրքիան' 64-րդը, Իրանը' 93-րդը:

Մարդկային ռեսուրսների և աշխատաշուկայի բաղադրիչով Հայաստանը վարկանիշային աղյուսակի 45-րդ հորիզոնականում է: Աղյուսակը գլխավորում է Իսլանդիան, որին համապատասխանաբար հաջորդում են Շվեյցարիան, Դանիան, Նորվեգիան, Սինգապուրը, Ֆինլանդիան, Գերմանիան, Շվեդիան, Ավստրիան, Նոր Զելանդիան, Նիդեռլանդները, Միացյալ Թագավորությունը, ԱՄՆ-ն և այլն: Վրաստանն աղյուսակում 51-րդն է, Ադրբեջանը' 30-րդը, Թուրքիան' 94-րդը, Իրանը' 105-րդը:

Տեղեկատվության և հաղորդակցման տեխնոլոգիաների ոլորտում պատրաստվածության բաղադրիչով Հայաստանն աղյուսակում զբաղեցնում է 71-րդ հորիզոնականը: Աղյուսակը գլխավորում է Հոնկոնգը, որին համապատասխանաբար հաջորդում են Դանիան, Շվեյցարիան, Շվեդիան, Նորվեգիան, Ֆինլանդիան, Միացյալ Թագավորությունը, Կորեայի Հանրապետությունը,մ Լյուքսեմբուրգը, Ճապոնիան, Իսլանդիան, Էստոնիան, Նիդեռլանդները և այլն: Վրաստանն աղյուսակում 67-րդն է, Ադրբեջանը' 50-րդը, Թուրքիան' 72-րդը, իսկ Իրանը' 94-րդը: