Եթե դուք սխալ օծանելիք եք օգտագործում, դեպի ձեզ եք ձգում սխալ մարդու. Պուտինի և Կադիրովի օծանելիքների հեղինակի խորհուրդները

Ֆրանսիական ՖԻՖԻ մրցանակաբաշխության ժյուրիի նախագահ, հեղինակավոր պարֆյումեր Ժաննա Գլադկովան անհատական բույրեր է ստեղծել ՌԴ նախագահ Վլադիմիր Պուտինի համար՝ նրա նախկին կնոջ պատվերով, ինչպես նաև՝ Չեչնիայի նախագահ Ռուսլան Կադիրովի համար՝ նրա կանանցից մեկի պատվերով: Այս մասին այսօր՝ ապրիլի 15-ին, լրագրողների հետ հանդիպմանն ասաց պարֆյումերը՝ նշելով, որ ինքը, սովորաբար, չի սիրում խոսել այդ մասին:

Խոսելով պարֆյումի ճիշտ ընտրության, ճիշտ օգտագործման կանոնների և գաղտնիքների մասին՝ Ժաննա Գլադկովան ասաց, որ օծանելիքը հարկավոր է օգտագործել այնպես, որպեսզի այն գերի, ոչ թե հակառակը: «Օծանելիքի սխալ օգտագործումը նման է շուրթերին լղոզած շրթներկի: Օծանելիքը պետք է ցանել դաստակների, պարանոցի հատվածում, մի փոքր էլ՝ մազերի վրա, սակայն ճիշտ չէ ածանելիքն օգտագործել ականջների հետնամասում, քանի որ այնտեղ ճարպային հանգույցները շատ են»,- նշեց նա՝ ավելացնելով, որ վատ ճաշակի արտահայտություն է, երբ մարդը մտնում է սենյակ ու հեռվից գալիս է նրա օծանելիքի բույրը:

Անդրադառնալով ֆերամոններին՝ պարֆյումերը նշեց, որ դրանք բույրեր են, որոնք հակառակ սեռի հետ կոնտակտ են ստեղծում և ըստ բույրերի՝ կարելի է սիրահարվել կամ հակառակը. «Ժամանակակից պարֆյումերիան 70 տոկոսով բաղկացած է մուսկուսից, որը կանացի սեռական գրգռիչ է, և ամբրայից՝ տղամարդու սեռական գրգռիչ, որոնք կարելի է համեմատել կողպեքի և բանալու հետ, և ստեղծվում է սեքսուալ ձգողականություն»:

Ժաննա Գլադկովայի խոսքով՝ եթե դուք սխալ օծանելիք եք օգտագործում, դեպի ձեզ եք ձգում սխալ մարդու: 

Նա ընդգծեց, որ չկան լավ ու վատ բույրեր, պարզապես կան բույրեր, որոնք արդեն գտել են իրենց հասցեատիրոջը. «Հագուստ ընտրելիս՝ գիտեք ձեր չափսերը, թե որ ձևը կսազի ձեզ, նույնն էլ օծանելիքի դեպքում է: Եթե օծանելիքը ձերն է, ապա հաջորդ օրը նրա բույրն այլևս ընդգծված չեք զգում, քանի որ այն ձեր մի մասնիկն է դարձել, նաև այն դեպքում, երբ այն սկսում է դուր գալ բոլորին»: