Ինքնավստահ նախարարը...

Բնապահպանության նախարար, ՀՅ Դաշնակցության անդամ Արծվիկ Մինասյանն իրեն տեսնում է նոր կառավարության կազմում և մտադիր է շարունակել պաշտոնավորումը Բնապահպանության նախարարի պաշտոնում: Այս մասին նշեց Մինասյանը ապրիլի 15-ին լրագրողների հետ զրույցում՝ պատասխանելով հարցին՝ տեսնո՞ւմ է իրեն նոր կառավարության կազմում:

Նախարարը կարծում է, որ ներկայումս չկա որևէ պատճառ հակառակը պնդելու, մանավանդ, որ ՀՅԴ հիմա ՀՀԿ-ի հետ քննարկումների փուլում Է, իսկ սա այն ոլորտն է, որը ոչ միայն Դաշնակցության, այլև` ըստ Մինասյանի, իրենց հանրապետական գործընկերների համար կարևորագույն, հիմնարար ոլորտներից է:

Ուշագրավ է, որ Արծվիկ Մինասյանը միակ նախարարն է, ով այդքան վստահ է իր քաղաքական ապագայի հարցում: Նրա կոլեգաները ավելի վատատես 1ին և լավագույն դեպքում լրագրողների հարցերին նախընտրում էին խուսափողական պատասխաններ տալ: Սեփական ուժերին վստահելը անշուշտ դրական երևույթ է, տեղ-տեղ նաև` գովելի, սակայն արդյոք դա կարելի է ասել բնապահպանության նախարարի համար, ում օրոք բնապահպանական գեթ մեկ լուծված խնդիր հիշելը կարծես թե ուժերից վեր խնդիր է:

Փոքր մեր երկրում հարավից-հյուսիս, արեւելքից-արեւմուտք բնապահպանական բազում խնդիրներ կան եւ դրանք լուծելու, կանխելու փոխարեն` առաջ են գալիս նորերը եւ ամբողջացնում բնապահպանական այն մտահոգող պատկերը, որ ունենք այսօր: Չափից ավելի քաղաքականացված մեր երկրում հետին պլան են մղվել բոլոր մյուս մարտահրավերներն ու խնդիրները, որ ձեռնոց են նետել մեր հասարակությանը՝ ապօրինի ծառահատումներ, անտառահատումներ, բաց ու անվերահսկելի աղբանոցներ, բնապահպանական օրենքներն ու նորմերը շրջանցող հանքարդյունաբերություն, էկո համակարգի աղտոտում եւ այլն: Եվ այս ամենը դեռ իրականություն է, դառը իրականություն, որի դեմ պայքարելու կամք դեռևս չի նկատվում: Արդյո՞ք ոլորտում առկա, մեղմ ասած, աղետալի վիճակն է նախարարին այդչափ մեծ վստահություն ներշնչել սեփական քաղաքական ապագայի վերաբերյալ…

Ստելլա ԽԱՉԱՏՐՅԱՆ